21-октябрдиз, Дагъустандин культурадин ва чIаларин юкъуз, ДГУ-да филологиядин илимрин доктор, профессор Ражидин Идаятович Гьайдаров рикIел хуьнин лишандик кваз тешкилнавай ва къецепатан уьлквейрин векилрин иштираквални авай Вирироссиядин илимдинни тежрибадин «Россиядин халкьарин чIаларин лексикадин ва лексикографиядин месэлаяр» конференция кьиле фена. Мярекатда преподавателри, студентри, илимдин къуллугъчийри ва аспирантри иштиракна. Конференциядал лексикографиядин, ономастикадин ва фразеологиядин кар алай месэлаяр веревирдна.
Ражидин Гьайдаров Дагъустандин языкознанидин, кавказоведенидин корифей, яни зурба алим, гьакIни Ватандин ЧIехи дяведин иштиракчи тир. Ада гзаф кьадар аспирантар ва студентар тербияламишна, пешекарар гьазурна.
«Алимдин уьмуьрдин ва яратмишунрин рехъ тамамдаказ Дагъустандин государстводин университетдихъ галаз алакъалу тир. Ина ада яргъал йисара Дагъустандин ва умуми языкознанидин, Дагъустандин чIаларин кафедрадиз регьбервал гана. Ражидин Гьайдарован аламатдин, нурлу къаматди чи республикадин филологиядин образованидин рехъ лишанламишзавай, ам адан дамах тир», — къейдна ДГУ-дин ректор Муртазали Рабаданова.
Зурба алимдин илимдинни ахтармишунрин рекьикай, яратмишунрикай ва агалкьунрикай филологиядин факультетдин декан Шабан Мазанаева суьгьбетна.
«Ражидин Идаятович чун вири патал гьич шаклувилик кутаз тежедай авторитет авай, лап хъсан регьбер тир. Адалай коллектив тупламишиз алакьдай. Ада кафедрада, факультетда авур вири крар исятдани къуватда ама, абурал амал ийизва», — лагьана ада.
Рахайбуру рикIел хкайвал, хайи чIал ва литература хуьнин месэлайриз алимди иллаки кьетIен фикир гудай: ада лезги халкьдин машгьур шаиррин – СтIал Сулейманан, Етим Эминан, Кесиб Абдуллагьан, Гьажи Ахцегьвидин, Хпеж Къурбанан, Аши Рамазанан, Азиз Алеман ва мсб. яратмишунар ахтармишунин ва абур халкьдиз раиж авунин рекье нетижалудаказ кIвалахдай.
«Муаллимдин уьмуьр адан ученикра давам жезва. Ражидин Гьайдарован ученикри чеб лингвистикадин гьар жуьре хилера чIехи пешекарар тирди тестикьарнава», — къейдна ДГУ-дин Дагъустандин чIаларин кафедрадин заведующий Муса Багьомедова.
Мярекатда иштиракай Р.Гьайдарован ученик, РД-дин Гьукуматдин Председателдин заместитель Нариман Абдулмуталибова рикIел хкайвал, алимди Дагъустан аваданламишунин, абад хьунин бинеда республикадин вири халкьарин адетар, чIалар, ивирар хуьн ва абурал амал авун авайди яз гьисабдай.
«Ражидин Идаятовичан регьбервилик кваз гзаф кьадар студентри диссертацияр хвена. Ихьтин преподавателар хьунай, ихьтин адетар къенин йикъалди хуьнай заз Дагъустандин госуниверситетдиз баркалла лугьуз кIанзава», — лагьана Нариман Абдулмуталибова.
Алимдин руш, ДГУ-дин ингилис филологиядин кафедрадин доцент Разият Ражидиновна Тажибовади (адани бубадин кеспи хкянава) профессор хизандихъ, дустарихъ галаз гьихьтинди тиртIа, гьадакай, адан инсанвилин хесетрикай суьгьбетна.
«Бубадиз ван алай мярекатар, суварар гзаф кIандай. Ам рикI ачух инсан тир. Вири хизан суварин суфрадихъ ацукьун ам патал иллаки важиблу тир – и жигьетдай са багьнани кьабулдачир. Бубади гуьзел шейэриз фикир гудай, адаз а гуьзелвал кьатIундай алакьун авай», — рикIел хкана ада.
Официальный пай акьалтIарайдалай кьулухъ конференция пуд месэладай (секциядай) давам хьана: «Россиядин халкьарин чIаларин лексика ва лексикография: месэлаяр ва гележег», «Фразеология лексикографиядин ва фразеографиядин жигьетдай ачухдай объект хьиз» ва «Ономастикадин теориядинни тежрибадин кар алай месэлаяр. Литературадин ономастика».
Къейд ийин, конференциядин кIвалахда онлайн-къайдада Россиядин гьар жуьре вузрай ва маса уьлквейрай тир алимрини иштиракна.
Амина Муслимова
