Курхуьряй тир машгьур карчи, «Санкт-Петербургдин лезгияр» региональный общественный тешкилатдин председатель, «Коломяги-Ретро» ЗАО-дин генеральный директор Зураб Шайдаева вичин хайиди тир Курхуьруьн СОШ-дин дарамат ремонт авунин кардиз куьмек гузва. И гьакъиндай «Лезги газетдиз» райадминистрациядин пресс-къуллугъди хабар гузва.

М.Рагьимован тlварунихъ галай 1-нумрадин мектеб кардик акатайдалай инихъ тамамвилелди ремонт авунвачир. Мектебдин къавни гьалдай акъатнава. Адан дакlарарни куьгьнебур я.

Эхиримжи вахтара хсуси инвесторри чпин такьатрихъ мергьяматлу крар гзаф кьилиз акъудзава. Зураб Шайдаева лагьайтlа, чешмеди къейдзавайвал, инлай виликни хайи хуьруьзни райондиз къаюмвал авунай. Кьилди къачуртlа. Ада халкьдин шаир Стlал Сулейманаз шаирдин кlвалин-музейдин патав памятник туькlуьрунин ва эцигунин, хайи хуьруьн цин турбаяр цlийи хъувунин ва маса кlвалахриз пулдин такьатар чара авуна.

Райондин кьил Нариман Абдулмуталибова Зураб Шайдаеван адресдиз чухсагъулдин чар ракъурна.

«Лезги газет»