Чаз виридаз играми шаирдин 150 йисан юбилейдин вилик зани къелем гъиле кьазва.
За а кардал дамахзава хьи, лезги шииратдиз жуван рехъни башламишай лап сифте кьиле СтIал Сулейманакай кхьенвай шиирар хьана:
Чи Лезгистан, СтIалрин хуьр гуьлуьшан,
Гьар инсандиз таниш я, гьакI масан я.
Куьз лагьайтIа, ана хана Сулейман,
Ам шаирдин юрд, бине я, ватан я…
…Сулеймана — лезги чилин билбилди —
Цуьквер цана шииратдин рекьера.
Уьмуьр ава, “Гомер”, вунни авазва,
Ви багьа тIвар акъатдач чи рикIерай!
Маса шиирда:
Гъиле-кIекIец, къуьне — гьебе,
Хура мани ифизва.
Варцаралди хьана рекье,
Шаир хуьруьз хъфизва…
Генжеда гъил кьеле хьана,
Бакуда — лукI нафтIадин.
Са тIимил пул хутахзава,
Чан хьиз хвена бафтадик…
Сулейман рикIе аваз теснифай нубатдин шиирда икI лагьанва:
Мад са шиир кхьена за,
СтIал шаир чешне кьуна.
Адан гурлу шииратдин
Къайнар булах чешме кьуна!
РикIел хквезва: зи рагьметлу бубади (гьамни шииратдал, эдебиятдал рикI алай кас тир) СтIал Сулейманан хкягъай эсеррин ктабдай зав гьамиша адан шиирар кIелиз тадай. А вахтара вични савадлу кас тиртIани, адаз гьа кар гзаф хуш тир. ЧIехи устаддин ктабдай “Регъуьхбанни яр”, “Кьве кIвачел къекъведай лам”, “Я стхаяр, пул авайдаз” шиирар мукьвал-мукьвал тикрариз тадай.
Са сеферда (ам гьинай жагъанатIа заз чидач) бубади заз арифдар шаирдин хва, Ватандин ЧIехи дяведин иштиракчи СтIал Мусаибан (Мусаиб Стальский) шииррин кIватIал гъана. Вичел хъсан жилд алай ктаб кьелечIди тиртIани, ана чапнавай шиирри Мусаибахъни илгьамдин дерин гьиссер авайди къалурзавай. Зун аял тир. Амма вичин рикIни эдебиятдал алай, гагь-гагь шиирарни теснифзавай бубадин (ам сифтегьан классрин муаллим тир) фикир, чIехи шаирдин хциз авай майилар гьа ихьтинбур тир… Гила а ктаб зав гумач. Аквар гьаларай, бубади хуьруьн библиотекадай къачунвайди тир…
…Гьикьван гьайиф къведай кар ятIани, вилик вахтарани, гилани Сулейманал пехилбурни хьана, къенин юкъузни кими туш. Адан яратмишунрик хуькуьрзавайбурни, “тIуб экъуьрзавайбурни” чаз малум я.
Са гьихьтин ятIани угърашри шаирдин кIвал-музейни цIай яна кана.
И беябурчивили вири элдихъ галаз зи рикIни тIарна, къарсатмишна. И барадай жуван шиирда — рикIин гьарайда за лагьанва:
ЧIехи элдин чIехи шаир,
Жавагьиррин ирс тир кас,
Эхирни ам жеда чаз чир —
Ви кIвализ авурди къаст.
А ягьсуздиз элдин лянет
Ялиз тежер пар жеда.
Шегьердани хуьре гьуьрмет
Амачиз, чил дар жеда.
Лезги халкьдин баркаллу рухвайри, вири элди кьил (къуьн) кутуна, шаирдин кIвал-музей — юрд-бине куьруь са вахтунда гьа авайвал эхцигнай. Чун патал чIехи сувар къурмишнай!
Нариман Къарибов
