Зун гьар гьафтедин хемис юкъуз, адет тирвал, нисинин береда хуьруьн алакъадин отделенидиз физва. Почтар хквезвай вахт я. Почтальонди зав нубатдин сеферда яцIу конверт вахкана. За гуьзлемишзавай затI авачир. Тажубвилелди кIелзава адрес: “Хасавюрт район, ЦIийи Къуруш. Фаталиев Кьасум…”
Зун гъавурда акьуна. Тахтай га-зетарни, зак акатай хъилерни рикIелай алатна, хтана зун кIвализ. Конвертда ктаб ава! ЯцIу жилдеринди, винелайни, чан алайди хьиз, Кьасум муаллим хъуьрезва.
Къалабулух кваз ахъайзава за ктаб. Адан сад лагьай чарчел ихьтин гафар кхьенва: “Элдин шадвилера уртах хьайи, элдин тIалар уяхарай, “Лезги газетдин” нур, къул хвейибурукай сад, мягькем даях хьайи журналист, шаир Шагьабудин Шабатоваз автордин патай савкьат!”
Кьасум муаллим заз жува шиирар кхьиз сифте камар къачур чIавалай чизва. Адан “Хъуьруьхъ, дустар!” ктабда авай сатирадин эсерар заз саки хуралай чир хьанва, мел-межлисрал, ацукьай — къарагъай чкайрал менфятни къачузва. А касдихъ галаз са кьас фу за Мердалидихъ галаз санал, Советский хуьре Ялцугъ Эминан юбилей тухудайла, тIуьна. Са югъ чна санал акъуднай.
ЦIийи ктабни марагълуди я, садра кIелайла, мад сеферда кIелиз кIан жезва.
“Юргъун тежердахъ инанмиш я” кьил ганвай макъалада рагьметлу шаир Лезги Арифан хва, РФ-дин писателрин Союздин член, гележег авай шаир, “ЛГ”-дин кьилин редактордин заместитель Муса Агьмедова кхьенва: “Юргъун тежер къелем” ктаб кIелайла, куьн юргъун тежедайдахъ зун кIевелай инанмиш я”.
Мусадин гафар зани тестикьарзава. Уьмуьрдив ацIай хъуьруьнрин, тешпигьрин, синагърин ктаб я.
Гьуьрметлу Кьасум муаллим!
Агакьна зал багьа савкьат.
Сад тир Аллагьди ваз гурай
Яргъал уьмуьр, гьакIни такьат.
Заз кIанзава вун кIубан хьун
Вири ви амай уьмуьрда.
Чаз такур затI амач жеди
Чал расал хьайи девирда.
Вири четинвилерай чун
Уьзягъдиз экъечIна.
Аллагь шукур, мадни цIийи
Крарив чун эгечIда.
Са карди чаз гузва сабур:
Квадарзавач чна абур.
Муъмин шаир, “чи айгьамчи”,
Гъиляй кими тахьуй къамчи!
Виш йис хьайи къужа хьурай,
Къелем мадни гужа хьурай!
Амин…
ЦIийи Макьар
Шагьабудин Шабатов
