За жуван хайи чIалалди акъатзавай газет кхьиз 57 йис тамам хьанва. Жегьил вахтарилай кIелзавай “Лезги газет” зи рикIиз гзаф чими я. 2001-йисуз вилерин экв зайиф хьуникди вахтуналди завай ам кIелиз жезвачир. Къуншийриз газет хтайла, ам кIелиз кIанз, гуя зи рикI акъатзавай…

Гена шукур Аллагьдиз, са шумуд вацра духтурханайра хьунин нетижада вилериз экв хтана. КIусни энгел тавуна, зун, газет кхьиз, жув яшамиш жезвай Герейханован хуьруьн почтадин алакъадин отделенидиз фена. Гьа­йиф хьи, подпискадин вахт акьалтIнавай. Эхир­ни кьарай авачир зун Кьасумхуьрел акъат­на, ина киоскда “Лезги газет” подписка авуна.

“Лезги газетдин” мана-метлеб, зи фикирдалди, лап чIехиди я. Алай вахтунда лезги чилел чIехи хьайи агъзурралди рухвайри, рушари неинки Урусатда, гьакIни дуьньядин маса уьлквейрани важиблу къуллугърал зегьмет чIугвазва. Газетдин мухбирри кIелза­вайбурал абурукай делилар агакьарзава. И дуьшуьшда завай газетдин кьилин редактордин заместитель Куругъли Ферзалиева кьиле тухузвай “Чи ватанэгьлияр — гьар сана” рубрикадин тIвар кьаз жеда.

“Лезги газетди” милли ирс, чIал, тарих, ме­деният, адетар хуьнизни, абур пакадин йи­къал агакьарунизни кьетIен фикир гузва. Вири дуьньядиз машгьур хьанвай СтIал Сулейман, Лез­гинцевар, Ярагъ Мегьамед, Гьажи Да­вуд, Алкьвадар Гьасан эфенди ва хейлин ­ма­са­бур чи халкьдин милли дамах я. Чна акьалт­­завай несилриз, гьабур чешне яз гъиз, тер­бия гун ге­рек я. Газетдин чинрал чи халкьдин кьегьал векилрин уьмуьрдикай, абурун баркаллу крарикай макъалаяр акъат­зава. Тербия гунин карда­ абурукай гьам диде-бубайривай, гьамни му­аллимривай гегьеншдиз менфят къачуз жезва.

ЧIал хуьн, адаз гьуьрметун хайи чил хуьнилай башламиш жезва. Девирар дегиш хьуникди чкайрал кIвалахар авачирвиляй алай вахтунда гзаф жегьилар патарал — шегьерриз­ физва. Гзафбуру гьанра хизанарни кутазва. Гьанра абурун хизанра чIехи жезвай гзаф кьадар аялриз дидедин чIал чир жезвач. Гьелбет­да, им диде-бубадин тахсир я. Нетижада­, хайи хуьруьз хтайла, лезгидин аялар урусдалди ра­х­азва. Яни бязибуру, чиз-чиз, акваз-акваз, чпин веледар милли яржаривай къа­къуд­зава. И кардиз рехъ гана виже къведач. Ам хайи чи­лиз, дидедин чIалаз гьуьрмет тавун жезва…­

Икьван чIавалди за “Лезги газет” почтадин­ ала­къадин отделенидай кхьизвай ва газет поч­тальонди кIвализ хкизвай. Газет хкидай гьар юкъуз зи вил ракIарал жедай. Гила лагьай­­тIа, за Кьасумхуьрел алай киоскдай вахчузва.­

Са кьве гаф газет подписка авуникайни лугьуз кIанзава. Парабуру, гьатта гьукуматдин­ кIвалахрал алайбуруни, йисан эвел кьиляй “Лезги газет” зур йис патал кхьизва. Бязи­буруз са йисан къене хайи чIалал акъатзавай­ газет кхьиниз харжзавай 875 манат (почтадин алакъадин отделенидай) гзаф аквазва. Ам­ма гьакьван сагъламвилиз зарар авай пIапIрус­рихъни ичкидихъ гузвай пул кIусни гьайиф къвезвач. Инсан сифте нубатда ватанперес хьун герек я. Хайи чIал, чил, бубайрин адетар хуьн ва веледризни чирун чи виридан буржи я.

Жуван макъала заз “Лезги газетдиз” бахш­навай шиирдалди акьалтIариз кIанзава.

Вун зи вилин нине я!

Хкаж хьанва вун дагъларин синерал,

Аквазва чаз гьар лезгидин гъилера.

Мани ягъиз чи ашукьри кимерал,

Ви тарифрин гафар ала мецерал.

 

Шумуд мани на ви чинра кхьизва,

Гьар манидихъ ажеб кьетIен дад ава.

Дагъустанда къе ви тариф ийизва,

Чи газетдихъ бегьерлу тир гад ава.

 

“Лезги газет” — лезги халкьдин тIвар алай,

Ви ад мадни хкаж хьурай цавариз!

Гъалибвилин, агалкьунрин зар алай

Тарих къуй ви фирай агъзур йисариз!

Вадим Жамалдинов, Герейханов