Донбассдин ислягь халкьар миллетбазрикай хуьнин, Украина миллетбазрикай михьунин макьсаддалди Россияди кьиле тухузвай дяведин махсус серенжемда гуьгьуьллувилелди иштиракзавайбурун жергейра неинки жегьилар, гьакI юкьван яшара авайбурни, юкьван яшарилай алатнавайбурни ава. Гуьгьуьллубурун жергедик алатай йисуз Мегьарамдхуьруьн райондин Гилийрин юкьван мектебдин муаллим Альберт Севзиханович Балабеговни экечIна.
Къанни цIувад йисуз акьалтзавай несилдиз чирвилерни тежриба гайи, жегьилрик датIана ватанпересвилин гьиссер кутазвай муаллим, вичин яшар 60-дав агакьнавай насигьатчи Россияди Украинада кьиле тухузвай дяведин махсус серенжемда иштиракдай фикирдал атана. Шазан 1-мартдилай СВО-да иштиракзавай муаллимди женгинин гьерекатра вич кIубандиз гьиссзава.
Альберт Балабегов 1965-йисан 1-апрелдиз Мегьарамдхуьруьн райондин Гилийрин хуьре дидедиз хьана. 1982-йисуз мектеб акьалтIарна, ДГПИ-дик экечIна. 1983-1985-йисара Советрин яракьлу кьушунрин жергейра къуллугъ тамамарна.
Муаллимвилин зегьметдин рехъ адаз 1989-йисалай Докъузпара райондин Къалажухрин мектебда башламишун кьисмет хьана. Ина кIвалахай 1989-1991-йисара, къени къилихар ва агъайнавал себеб яз, адалай неинки ученикрин, гьакI вичиз таниш тушир дагълух хуьруьн агьалийрин патайни гьуьрмет къазанмишиз алакьна. Идан патахъай а карди шагьидвалзава хьи, Альберт муаллимдикай хуш гафар лугьузвайбур, ам рикIел алайбур чи йикъарани гзаф гьалтзава. Гуьгъуьнлай ада хайи хуьруьн мектебда жуьреба-жуьре тарсар гана. 2004-йисуз директордин тербиядин рекьяй, 2005-2011-йисара кIелунрин рекьяй заместителвилин къуллугъ кьилиз акъудна.
Фельдшервилин рекьяй госпиталда са вацра тежриба ва чирвилер кIватIай Альберт муаллимди тактикадин медицинадин рекьяй ротадин фельдшер ва санинструктор яз къуллугъзава. Гьар са кар гъиляй къведай, гьар са кар фад кьатIудай алакьунар авайвиляй адавай вич медицинадин рекьяйни куьмекар гуз жедай пешекар тирди тестикьариз хьана. Ам гъалатI хьанач: гьакъикъатдани ада хирер-кьацIар, хасаратвилер хьанвай хейлин аскерриз медицинадин рекьяй куьмекар гана ва гузва.
Са мисал. 2024-йисан декабрдиз Херсондин областда душманди кьве беспилотник ахъаюнин нетижада сержант Р. Елгушевахъ ракьун кIус галукьна ва адал хер хьана. Вичин уьмуьр хаталувилик акатунизни килиг тавуна, чIехи сержант Альберт Балабегов женгинин юлдаш галай патахъ фена, ам хатасуз чкадиз хкана ва тадиз медицинадин рекьяй сифтегьан куьмек гана. Четин декьикьада ада гъил-гъилеваз кьилиз акъудай серенжемди аскердин уьмуьр къутармишна ва адаз женгинин тапшуругъ кьилиз акъуддай мумкинвал гана. Чандилайни гъил къачуна, фагьумлувилелди, жуьрэтлувилелди женгинин юлдаш къутармишунай А. Балабегов «Телеф жезвайди къутармишунай» медаль гун патал къалурнава.
— Гуьгьуьллувилелди дяведин махсус серенжемда иштиракдай фикирдал атайла, хизанди, мукьва-кьилийри куь къарар гьикI кьабулна? — хабар кьуна за Альберт муаллимдивай.
— Зи саки 50 ученик СВО-дин иштиракчияр я. За жувни гьана герекзаваз гьисабна, — ихтилатна ада. — Хизан зи гъавурда акьуна. Заз аксивалдай, зи фикир дегишардай алахъунар садани авунач. Захъ галаз дагъустанвийрикай аварри, ногъайри, яхулри, азербайжанри санал женгерин гьерекатра иштиракзавай.
Алай вахтунда Альберт Балабегова ял язава — ам майдин сифте йикъара отпускдиз хуьруьз хтана. Икьван чIавалди гана кIанзавай отпускдин йикъарни амукьнавайвиляй адаз санлай яргъи отпуск ганва — 5-августдиз элкъвена хъфида.
Миллетбазрихъ галаз женг тухуник, гъалибвал къазанмишуник вичин пай кутун ва ватанпересвал кардалди къалурун кьетI авур муаллимдиз 11-апрелдиз хьайи 60 йисан юбилей гила хизандихъ, багърийрихъ галаз санал къейддай мумкинвал хьанва. Мукьва-кьилийри, Гилийрин мектебдин ва виликдай Къалажухрин мектебда тарсар гайи ученикри адаз юбилей мубаракзава. Баркаллу ватанэгьлидин юбилей рикIин сидкьидай тебрикзавайбурухъ галаз чунни шерик я.
Яшаризни килиг тавуна, муаллимвилин важиблу кIвалахни кьулухъ туна, махсус серенжемда иштиракзавай Альберт Балабегов хьтин ватанперес, жуьрэтлу ксарин тереф гъалибни жеда. Са шакни алачиз.
Куругъли Ферзалиев
