И мукьвара «Лезги газетдин» редакциядиз РФ-дин лайихлу художник, РАХ-дин член-корреспондент, Дагъустандин халкьдин художник, профессор, машгьур гзаф тимталар туькIуьрнавай скульптор Шариф Шагьмарданович Шагьмарданов мугьман хьана. Газетдин кьилин редактор М. Ибрагьимовахъ ва адан заместитель К. Ферзалиевахъ галаз кьиле фейи гуьруьшдал бажарагълу художникди алай вахтунда гъиле кьунвай, фикирдик квай кIвалахрикай ихтилатна.
Малум тирвал, Ахцегьай тир Шариф Шагьмарданович 1995-йисалай Санкт-Петербургда яшамиш жезва ва ана кIвалахзава. Ада вичин патай 2024-йисуз Санкт-Петербургда чапдай акъатнавай «Шариф Шагьмарданов. Уьмуьр ва яратмишунар» еке кIалубдин гуьрчег ктаб пишкешна. Мугьмандиз редакциядин патай К. Ферзалиева «Баркаллу лезгияр» (ана художникдикай ва адан яратмишунрикай кьилдин макъала гьатнава) ктаб гана.
Ш. Шагьмарданова Ленинградда И. Репинан тIварцIихъ галай институтда кIелна. 1975-йисуз ам СССР-дин художникрин союздиз кьабулна, 1982-йисуз адаз Дагъустандин искусствойрин лайихлу деятелвилин тIвар гана.
Махачкъалада авай «Ватан хуьзвайди» монументдай чи ватанэгьлидиз И. Шамилан тIварцIихъ галай медаль гана. КьетIендаказ къейд ийиз кIанзава, тIвар кьунвай тимтал Россиядин балкIанрин лап хъсан монументрикай яз тестикьарнава ва ам «Россиядин лап хъсан эсеррин къизилдин фондуна» гьатнава. Вини дережадин алакьунриз килигна, 2009-йисуз адаз Россиядин художествойрин академияди къизилдин медаль гана.
Эхиримжи йисара Шариф Шагьмарданова туькIуьрай тимталрикай рахайтIа, чавай 2015-йисуз Дербентда эцигай «Дидедин гъам», 2017-йисан 18-майдиз Агъа СтIалрал Дагъустандин халкьдин шаир СтIал Сулейманаз ачухай (и юкъуз скульптордив «Хайи чилихъ авай кIанивиляй» Дагъустандин дережадин медаль вахкана), 2020-йисуз ЦIийи Макьарин хуьре ачухай «Память», 2023-йисуз Ленинграддин областдин Приозерск шегьерда ачухай «Аскердиз — Ватан азад авурдаз», 2024-йисуз Ахцегьа хкажай Шарвилидин тимталрин тIварар кьаз жеда.
Алай вахтунда художникди са жерге тимталар арадал гъунал зегьмет чIугвазва. Чаз адахъ чандин сагъвал ва рикIе авай мурадар кьилиз акъуддай мумкинвилер хьана кIанзава.
Салим Салимов
