Чакай гьар садахъ вичин гъвечIи ватан ава: вун хайи ва чIехи хьайи багьа чка. Зи гъвечIи ватан Докъузпара райондин ЦIийи Къаракуьре я. Хайи хуьруькай завай яргъалди рахаз жеда, анин куьчейра акъудай бахтлу, секин, къалабулух квачир аял вахтарикай.
Хуьруькай фикирайла, кьилиз къведа гатун серин нянин вахт, рагъ хъфизва, мичIи жезва. Са гьинай ятIани, са нин ятIани, кали гьарайзава, кицI элуькьзава. Суьруьдай хквезвай хипери чпин кIвалерихъди гьерекатзава…
Зи хайи хуьр йисан гьи вахтунда хьайитIани гуьрчег я. Иллаки — гатуз. А вахтунда чилер къалин ва мижелу къацувиле батмиш жезва, чуьллер жуьреба-жуьре цуьквери кьазва. Им векьер ядай вахт я. Дергесар гваз инсанар чуьлдиз рекье гьатзава. Сифте — маргъвар. Кьурайла, абур кIватIзава, кIунтIар кьазва. Эхирдай вири санал хкана, еке маркв эцигзава.
И кIвалахрикай кхьиз регьят я, амма и зегьмет гзаф агъурди я. А вахтунда иллаки ветIери ва гатун зегьемди гьелекда. ЯтIани, марфар къваз башламишдалди кIвалахар акьалтIарна кIанда. Зи хуьруьнвияр кагьулвалдайбур туш. Абуру чпин салара емишар, майваяр битмишарзава. Инсанри, чIижери хьиз, зегьмет чIугвазва.
ХъуьтIуьн вахтунда, рекьер-хуьлер живеди кьурла, саврухди дакIардихъ къув ядайла, чими кIвале ацукьун сафалу я. Пакамахъ вири хуьр лацу, пурпу маргъалри кIевна жеда. Иллаки живеди кьунвай тарар махарик квай аждагьанар хьиз аквада. Кьуд пад суьгьуьрда, нурлувиле гьатна жеда. Йифен саврухдилай кьулухъ хуьруьнвияр гьаятар, къавар живедикай михьи ийиз эгечIда. Шад яз, аялар къугъваз фида, живедин кIватIар цава жеда. МуркIадин майдандилай авахьда, живедин кIвалер эцигда. Юкъуз, ракъини экв артухарайла, живеди рапрап гуда, кьуд пад пара гуьрчегдиз аквада.
Гатфариз гьикьван иер жеда! ТIебиатдихъ галаз санал хуьрни цIийи хъижеда. Гатфарин ракъинин сифте нурар галукьайла, инсанрин гуьгьуьларни кIубан жез эгечIда. Тарарал тIурар хъиткьинда, цуьквералди безетмиш жеда.
Зулуз шикиларни гуьрчегбур я. ТIебиат перишан тавара гьатда. Гьа са вахтунда тарари жуьреба-жуьре рангарин парталар алукIда, абур хважамжамдин къацу, яру, хъипи, къизилдин рангара гьатда. Гуя заз жуван хуьруькай вири чизва. Амма чи хуьруьн яшлу агьалийрихъ яб акалайла, зун жуван хайи макандиз маса тегьерда килигиз эгечIна.
Гьар са касдихъ вичин рикI алай, гуьрчег чкаяр ава. Шегьерэгьли аялар ял ядай вахтара рикI аладарун патал хайи чкайриз хквезва. Абуруз хуьр акваз, ам гьикI аватIа чириз кIан жезва: виликдай хьиз амани, тахьайтIа дегиш хьанвани? Гьа икI уьмуьрни давам жезва…
Багьаханум Шихкеримова,
ДГУ-дин студентка
