Накь Дагъларин уьлкведин меркезда республикадин газетринни журналрин комплексдин патав къизгъин вакъиайрин, женгерин гьалара телеф хьайи Россиядин ва Дагъустандин журналистар эбеди авун патал гьазурнавай «Журналистрин аллея» ачухуниз талукь мярекат кьиле фена.
Республикадин журналистри и месэла виликдайни са шумудра гьукумдин органрин вилик эцигнай. СМИ-рин векилар кIватI хьана, телеф хьайи журналистрин тIварарихъ скверда къелемарни цайиди я. Абурукай гила тарар хьанва. РФ-дин журналистрин союздин Дагъустандин отделенидин председатель Мегьамед Ибрагьимова и месэла мад майдандиз ахкъудна ва Махачкъаладин администрациядиз герек чарар кхьена. Нетижада шегьердин мэр Юсуп Умавова и кардин тереф хвена ва «Алай аямдин шегьердин къулай гьал» программадин гьисабдай сквер аваданламишна.
Вири крар «Спецремстроймонтаж» ООО-дин устIарри тамамарна. Инаг пара гуьрчегдиз туькIуьрнава. 30 куьсри, 30 урна, 34 лампа алай шалман эцигнава. Тарариз яд гудай турбаяр туькIуьрнава. ГъвечIи аялриз къугъунардай ва спортдин майданни арадал гъанва. Ана гьар юкъуз аяларни галаз цIудралди дидейри, бадейри ял язава.
Шегьердин мэр Ю. Умавова виридаз «Журналистрин аллея» ачухун тебрикна, шегьер мадни аваданламишунин мураддалди тухузвай кIвалахрикай ихтилатна, и хъсан крар кьиле тухуз куьмек гузвай РД-дин Кьил Сергей Меликоваз, эцигунардайбуруз сагърай лагьана.
— Аллея пара гуьрчегди хьанва. Чна адаз, жуьреба-жуьре йисара чпин къуллугъдин везифаяр уьтквемвилелди тамамардайла, телеф хьайи журналистар эбеди рикIера хуьн патал «Журналистрин аллея» тIвар гузва. Журналистри исятдани дяведин махсус серенжем кьиле физвай мулкара, хаталувилизни килиг тавуна, чпин везифаяр жуьрэтлувилелди кьилиз акъудзава. Къе чна террористри уьмуьрдивай авур Мегьамед-Салигь Гусаев, Загьир Арухов, Гьажи Абашилов ва масабурни рикIел хкун лазим я, — лагьана Ю. Умавова.
Абад Азадов
