Украинадин миллетбазрикай Россиядик эхкечIнавай регионрин мулкар ва Курскдин областдин хуьрер азад авуниз талукь махсус серенжем давам жезва. Россиядин армиядин кьушунри эхиримжи са вацра къадав агакьна хуьрер, шегьерар азаднава. Къе-пака Красноармейскни (Покровск) нацистрин гъиляй ахкъуддайвал жеда.

Махсус серенжемда иштиракзавайбуруз вири халкьди куьмекзава. Дагъустанвиярни кьулухъ акъвазнавач. И йикъара Дербент шегьердин агьалийри Донбассда аскерриз гьар юкъуз­ герек къвезвай шейэр — чими парталар, гуьлуьтар, чекмеяр, дарманар, генераторар, пичер рекье туна. Абур кIватIунин карда шегьердин вири къатари иштиракна. Студентри аскерриз чарар кхьена.

СВО-диз куьмекдин гъил яргъи авунин карда шегьердин собранидин депутатар тир Ислам Бабаева ва Мегьамед Агъа­балаева иштиракна.

Ислам Бабаева къейд авурвал, уьлкве патал четин вахтунда куьмекдин гъил яргъи авун важиблу я. Шегьердин Гь. Къазиагьмедован тIварунихъ галай педколледждин коллективдиз, иллаки студентриз аферин лугьуз кIанзава. Абуру баркаллу кардик рикIивай чпин пай кутуна.

*  *  *

Къадим шегьерда «Регьимлувилин чим гун» лишандик кваз дяведин махсус серенжемдин иштиракчийрин аялриз талукьарнавай мергьяматлувилин мярекат кьиле тухвана. Ана шегьердин администрациядин кьил Агьмед Къулиева, шегьердин собранидин председатель Гьасан Мирзоева, жемиятдин деятелри, динрин, жегьилрин тешкилатрин векилри иштиракна.

Муниципалитетдин кьили мярекат тешкилайбуруз («Михьи рикI» фонд, меценат Гь. Абакаров) сагърай лагьана ва ихьтин серенжемар тешкилунихъ еке метлеб авайди ­къейдна.

Меценат Гьажимурад Абакарова мярекатдин иштиракчияр тебрикна ва лагьана: «Гьар са хизан Аллагь-Тааладин регьимдик хьурай! Ватандин аслу туширвал патал женг чIугвазвай, уьл­кведин итижар хуьзвай чи аскерриз сагъвал гурай! Чун гъалибни жеда».

Мярекатдиз теклифнавай 300 аялдиз тешкилатчийрин патай пишкешар гана. Абурун вилик кьуьлердай «Гюнеш» ансамбль, шегьердин искусстводин устадар экъечIна.

*  *  *

СтIал Сулейманан райондай дяведин махсус серенжемда цIудралди кьегьалри иштиракзава. Абурун жуьрэтлувал, ­уьтквемвал чешне къачудайди я. Идан гьакъиндай Россиядин Федерациядин Игит лагьай тIварцIиз лайихлу хьанвай сайтархуьруьнви Муслим Муслимован баркаллу къуллугъди шагьидвалзава.

Райондин администрацияди, агьалийри Ватандин итижар хуьзвайбур рикIелай алудзавач, абуруз датIана мергьямат­лувилин куьмекар рекье твазва. И йикъарани райондай ну­батдин гуманитарный пар рекье туна. Районэгьлийри — дишегьлийри, школайрин, аялрин бахчайрин коллективри Дишегьлийрин советди кьил кутунвай «Аскердиз — посылка» акцияда иштиракна ва недай суьрсетдикай, дарманрикай, чими парталрикай, гигиенадин затIарикай ибарат 250 посылка гьазурна. Гьар са посылкада школьникри аскеррал дамахзавай, абурун руьгь хкаждай гафар кхьенвай чарарни тунвай. Аялри чи аскерриз, гъалибвал хьана, сагъ-саламатдиз хтун алхишзава.

И хъсан кар тешкилуник кьил кутурбур райондин админист­рациядин кьилин сад лагьай заместитель Лацис Оружев, образованидин управленидин начальник Гьуьсейн Шихбабаев ва волентерар тир.

— «Аскердиз — посылка» акцияда иштиракуналди, чна аялар, жаванар хъсан крар авунал желбзава, абурун къанажагъ мягькемарзава, руьгьда ахлакьдинни марифатдин, ватан­пересвилин ивирар мягькемарзава, — лугьузва Л. Оружева. Махсус серенжемда авайбуруз куьмек гун чна мадни давамарда.

*  *  *

 Кьурагь райондин администрациядин кьил Замир Азизова дяведин махсус серенжемдин иштиракчи Хидирнаби Мегьамедов кьабулна. Женгинин тапшуругъ тамамардайла, аскердал хер хьана. Госпиталда сагъар хъувурдалай гуьгъуьниз ам ял ягъиз хтанва. Суьгьбетдин вахтунда муниципалитетдин регьберди аскердивай армияда къуллугъзавай, командиррин тапшуругъар кьилиз акъудзавай гьалдикай, юлдашрин агалкьунрикай ва хсуси яшайишдикайни хабарар кьуна. Хизандиз вуч куьмек герекзаватIа, гудайдакайни лагьана.

Хидирнаби Мегьамедова аскеррин къайгъуйрикай, женгерикай ихтилатна, Россия гъалиб жедайдахъ инанмишвал къалурна.

Замир Азизова Ватандин къуллугъда акъвазнавай викIегь аскердиз руьгь хкаждай хуш келимаяр лагьана.

Абад  Азадов