2,29 миллиард ­манат

Дагъустанди, «Уьмуьр патал инфраструктура» милли проектдин сергьятра аваз, федеральный бюджетдай пуд йисуз коммунальный инфраструктура цIийикIа туьхкIуьрун (модернизация) патал 2,29 миллиард­ манат пул къачуда. Идакай РД-дин ­эцигунрин, архитектурадин ва ЖКХ-дин министерстводин телеграм-каналди ха­бар гузва.

Раижзавай делилрай гъавурда акьазвайвал, целди таъминардай пуд проект кьилиз акъудуниз цIи 640 миллион манатдин кьадарда аваз пулдин такьатар чара авун фикирда кьунва:

Каспийск шегьердин агьалияр хъвадай михьи целди таъминардай насос­рин станцияр михьи яд кIватIдай резервуарар цIийикIа туькIуьр хъувун. Абдулманапован тIварунихъ галай куьчеда авай насосдин станция;

Каспийск шегьердин агьалияр хъвадай михьи целди таъминардай цин турбаяр цIийикIа туькIуьр хъувун;

Хасавюрт райондин Сулевкент хуьре, цин турбайрин цIийи линияр тухуналди, целди таъминардай сетар гегьеншарун.

Къейдзавайвал, региондин бюд­­жет­дайни 330 миллион манат чара­ ийи­да.

Гзаф хьанва

2024-йисан нетижайралди, Дагъус­танда саки 160 тонн дуьгуьдин бегьер кIватнава. Им, алатай йисан рекъемдив гекъигайла, 10 агъзур тонндин гзаф я. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмедин къейдерай гъавурда акьазвайвал, республикада прунз  цанвай майданар са йисан къене 2 агъзур гектардин гзаф хьанва: 32 агъзур гектардилай 34 агъзур гектардал кьван.

Гьа са вахтунда хабар гузвайвал, 2024-йисан январь-ноябрь варцара 228,7 миллиард манатдин къимет авай хуьруьн майишатдин продукция гьасил­нава. Алатай йисан и муддатдив гекъигайла, и рекъем 6 процентдин виниз акъатнава.

Телеграм-каналди гъизвай делилралди, Дагъустанда прунз виридалайни гзаф Къизляр районда кIватIзава. И районда прунз цадай кьилин мулкар экIя хьанва — 18,7 агъзур гектар ва я вири республикада и магьсул цанвай майданрин умуми гьисабдин 54,1 процент.

Дагъустанда прунздин виридалайни машгьур сортар ибур я: «регул», «хазар», «рапан», «полевик».

РикIел хкин, виликдай Дагмелиоводхоздин телеграм-каналди, РД-дин хуьруьн майишатдин ва недай суьрсетдин министрдин сад лагьай замес­титель Шарип Шарипован гафарал асаслу яз, Дагъустанда цIуд йисан къене дуьгуь гьасилун 4,5 сеферда артух хьанвайдакай хабар ганай.

Хъсан бегьер

Алатай йисан нетижайралди, Да­гъустан, халияр (къарпузар), буранар  гьасилунал гьалтайла, кIвенкIвечи регионрин жергеда амукьнава. Идакай РД-дин хуьруьн майишатдин ва недай суьрсетдин министерстводин телеграм-каналди хабар гузва.

Чешмеди къейдзавайвал, къарпузрин, гатун халийрин ва буранрин хъсан бегьерар республикадин 30 муниципалитетди кIватIнава. Абур цанвай мулкарин кьадар, санлай къачурла, респуб­ликада 8 агъзур гектардилай алатнава­ ва анай 227 агъзур тонндилай гзаф бегьер кIватI хъувунва. КIвенкIвечи му­ниципалитетрин арада Ногъай, Къиз­ляр, Бабаюрт, Дербент ва Хасавюрт районар ава. Гьам рес­публикада, гьам­ни адалай къецепата къарпузрин­ «каристан» сорт вири­дайни гзаф тIалабзавайди яз тайин хьанва.

Гьазурайди — Муса Агьмедов