Ватан хуьзвайбурун йис малумарун чи уьл­кведин гьар са агьали, хизан патал важиблу, метлеблу вакъиа я. Государстводин итижар, гъиле яракь кьуна, жуьрэтлувилелди хуьзвай, уьлкведин аслу туширвал патал чанар къурбандзавай кьегьалар чна гьамиша рикIел хуьн лазим я.

Ватан хуьзвайбурун йисан сергьятра аваз, СтIал Сулейманан районда жуьреба-жуьре мярекатар кьиле тухузва, дяведин махсус серенжемда телеф хьайибур рикIел хкизва. ИкI, Курхуьруьн юкьван школадин цлал РФ-дин оборонадин министерстводихъ галаз кутIунай икьрардин бинедаллаз дяведин махсус серенжемда иштиракай ва къизгъин женгера телеф хьайи Абдулманаф Фергьатован ва Гьарун Гьасаналиеван шикилар авай кьулар алкIурна.

Абдулманаф Фергьатова 2022-йисан ок­тябрдилай гьужумдин бригададин лишанчи  яз къуллугъзавай. ЯхцIур йисан яш­да авай аскердихъ дагъвидиз хас уьт­квемвал, дирибашвал авай. Командиррилай гьихьтин тапшуругъ агакьнатIани, ада абур тамамарна. Душмандин сенгер­рал гьужумдайлани­, ам гьамиша­ вилик жергейра жедай. 2024-йисан 28-июлдиз викIегь аскер ЛНР-дин Оборот­новка хуьруьн патав кьиле фейи женгина телеф хьана. Адаз «Жуьрэтлувиляй» орден гана.

Къанни кIуьд йисавай Гьарун Гьасаналиев  2024-йисан 21-сентябрдиз телеф хьана. Адаз кьейидалай кьулухъ «Жуьрэтлувиляй» орден гана.

Игит аскерар рикIел хкидай мярекатдал абурун багърияр, хуьруьнвияр, райондин ва хуьруьн администрацийрин къуллугъчияр, школьникар, муаллимар ва жемиятдин идарайрин векилар кIватI хьанвай.

— Къе чна, чи игитар ри­кIел хкуналди, абуруз, юкь агъузна, икрамзава, — лагьана райондин администрациядин кьил Саид Темирханова, — абуру чпин жегьил чанар Ватандин итижар патал къурбандна­. За кьегьал рухвайрин багърийриз вири районэгь­лийрин патай башсагълугъвал гузва. Абурун  игитвилер чи государстводин тарихда ва халкьдин рикIе амукьдайбур я. Са рахунни алач, хизанра ва школада чи аскеррив агакьай тербиядихъ еке метлеб­ хьана. Абур Ватан, халкь кIани рухваяр тир. Ихьтин ла­йихлу кьегьалар тербияламишай диде-бубаяр ва муаллимар сагърай!

Игитар чи рикIера амай кьван гагьда абур чахъ галаз яшамиш жезва лугьудай ихтилат авайди я.  Къе чна и цлал ал­кIурнавай аскеррин шикилар авай кьулари къвезвай несилризни абурун игитвилерикай ихтилатда.

Мярекатдал рахай аскеррин багъ­рийрин­, муаллимрин ва масабурун фикирар сад хьтинбур тир: кьегьал рухваяр гьамиша ри­кIера хуьн; абур къвезвай несилриз чешне яз къалурун; дяведин махсус серенжем куьтягь хьана,­ аскерар кIвалериз сагъ-саламатдиз хтун.

Хийир Эмиров