Дяведин махсус серенжемда Ватандин вилик чпин буржи ва командиррин тапшуругъар тамамарзавай аскерри четин шартIара къуллугъзава. Россиядин Федерациядик эхкечIнавай рес­публикайрин ва областрин мулкар миллетбазрикай, цIийи фашистрикай­ азадзава. Абурун ва хизанрин гьа­къин­дай федеральный, республикадин гьукуматри ва муниципалитетри гьар йикъан къайгъударвал ийизва.

Докъузпара райондин админист­ра­ция­­дин кьил Мегьамед Шамилов Къала­жухрин хуьряй тир отпускдиз хтанвай махсус серенжемдин иштиракчи, прапорщик  Челеби Селимовахъ галаз гуьруьшмиш хьана. РФ-дин оборонадин министерстводихъ галаз икьрар кутIунна, фадлай къуллугъзавай аскердивай муниципалитетдин кьили женгерикай, сагъламвиликай, къуллугъдин юл­дашрикай хабарар кьуна.

Суьгьбетдин вахтунда Селимова­ райондин гьакимдивай гьаждал физ кIан­­завай вичин дидедиз куьмекун тIа­лабна. Мегьамед Шамилова фикир лап хъсанди тирди, амма гъилевай йисуз гьаждал фидай путевкаяр вири пайнавайди къейдна. И мес­эла вичин гуьзчивилик жедайди ва ам гьялун патал лазим вири мумкинвилерикай менфят­ къачудайди хиве кьуна.

Муниципалитетдин кьили къейдна­ хьи, Селимова дяведин махсус  серенжемда ви­кIегьвилелди иштиракуниз, гъа­либвал къазанмишуник вичин пай кутуниз администрацияди еке къимет гузва ва аскердиз, адан хизандиз герек  вири куьмекар гуз гьазур я.

— Ял яна, вун къуллугъзавай частуниз хъфида, — лагьана М. Шамилова.- Жуван везифаяр, гьамиша хьиз, дирибашвилелди кьилиз акъуда, гъалиб хьана, сагъ-саламатдиз хъша.

Суьгьбетдин эхирдай М. Шамилова Челеби Селимоваз Ватандиз вафалувилелди къуллугъ авунай, командиррин тапшуругъар викIегьвилелди кьилиз акъудунай сагърай лугьузвай чар гана.

— Ихьтин гуьруьшри чи аскеррин ватанпересвиликай, кьегьалвилерикай лугьузва. Ватан хуьн, адан абадвал патал мадни еке ва хъсан крар ийидай ашкъи кутазва, — къейдна М. Шамилова.

*  *  *

СтIал Сулейманан райондин администрацияда, дяведин махсус серенжемда чпин къуллугъдин везифаяр тамамардайла, телеф хьайи аскеррин хизанрив гьукуматдин шабагьар вахкунин мярекат кьиле фена.

Миллетбазрихъ галаз кьиле фейи женгера игитвал къалурай Агъа СтIал-Къаз­майрилай тир офицер Заур Гьажие­ван ва икьрардин бинедаллаз къуллугъ авур Тельман Абдулаеван хизанрив «Жур­эт­лувиляй» орденар вахкана.

Кьегьалрин дидейрив ва уьмуьрдин юлдашрив шабагьар вахкудайла, Темирханова абуруз башсагълугъвал гана, игит рухваяр гьамиша рикIера хуьдайдакай лагьана.

Абад  Азадов