Мукьвал вахтара Ахцегьрин хуьре хъсан патахъ дегишвилер гзаф хьанва. ИкI, Дагъустандин халкьдин шаир Хуьруьг Тагьиран памятник авай багъ акур кас гьейран жеда, ам гьатта чир техжедай тегьерда дегиш хьанва. Шегьердин паркара жедай хьтин эквер куькIуьрнава. Инаг акур гьар садаз, иллаки йифиз, вич шегьердин паркуна авай хьиз жеда. Багъда ацукьдай скамейкаяр, яшлубур патал мадни къулай чкаяр гзаф ава. Гад-кьуьд къацу тарари, гатуз лагьайтIа, гьар жуьредин цуьквери, плитаяр туна чIагурнавай инсанар къекъведай рекьери и багъ мадни гуьрчегарзава.
Гьар йисуз суваррин шадвилер кьиле тухузвай, Советрин Союздин Игит Валентин Эмирован тIварунихъ галай багъдани, алатай йисарив гекъигайла, гзаф дегишвилер хьанва. Аниз гьахьзавай цIийи гурар, цIийикIа туьхкIуьрнавай рекьер, игитдин памятник… акурла, рикI иллаки шад жезва.
СССР хьтин къудратлу гьукумат арадал гъайи регьбер Владимир Ильич Ленинан памятникни туьхкIуьр хъувунва, культурадин кIвалин вилик, ам виридаз аквадай чкадал мягькемдиз акъвазнава. Ахцегьа, вацIун къерехда, чи республикадин са райондани авачир хьтин «Набережный» тIвар алай парк туькIуьрна куьтягьнава. Чкадин агьалийрилай гъейри, ина мугьманривайни къулайдиз ацукьна, ял ягъиз жеда. ЦIуд агъзур квадратный метрдин майдан кьунвай и паркунин агъа кьиле аялар патал вири тадаракралди таъмин тир майдан туькIуьрнава.
Мукьтадир Айдунбегован тIварунихъ галай паркни цIийикIа туьхкIуьр хъувунвайди, къулай шартIар тешкилнавайди къейд хъийиз кIанзава. Зи рикIел рагьметлу Хуьруьг Тагьира лагьай «Бязибуру тариф ийида, женнет я лугьуз Ахцегьар» гафар рикIел хквезва. И кIвалахар вири район вилик фин патал къачузвай йигин камар тушни? Халкьдин дуланажагъ хъсанарун патал зегьмет чIугвазвай вири ксар сагърай!
Къуй вирибурун кIвалера берекатар бул, дуьньяда ислягьвал, чи балайрин гележегни экуьди хьурай!
С.А.Абдурашидов, Хъуьлуьдар
