“Лезги газетдиз” Дагъустандин Пенсийрин фондунай хабар гайивал, ЧIехи Гъалибвилин 75 йис тамам хьунин сергьятра аваз республикада 7 агъзурни 509 агьалидив са сеферда гузвай пулдин такьатар агакьда. Абурукай Махачкъалада 884 кас ава. 3-апрелдилай ихтилат физвай пулдин такьатар пайиз гатIуннава.
Къейд ийин хьи, и макьсадриз пул федеральный бюджетдай чара авунва.
Дагъустанда Ватандин ЧIехи дяведин иштиракчийриз, набутриз, чпин яш 18 йис тахьанмаз концлагерра хьайибуруз, Ленинград гьалкъада гьатай чIавуз ана амукьайбуруз ва ветеранрин хендедайриз 75 агъзур манат гуда. Дяведин йисара далу пата зегьметдин фронда кIвалахайбурув 50 агъзур манат агакьда. Пулдин такьатар Урусатдин Пенсийрин фондуни пенсийрихъ галаз санал гудайвал я.
«Лезги газет»
