Уьлкведин Президент Владимир Путина РФ-дин Гьукуматдин членрин, регионрин руководителрин рикIел датIана СВО-дин иштиракчийриз ва абурун хизанриз жезмай кьван хъсанвилер, галайвилер, кьезилвилер авуна кIанзавайди хкизва. Дагъустандин Кьил Сергей Меликовани и жигьетдай вичин везифаяр хъсандиз тамамарзава. Адалай районрин, шегьеррин регьберрини чешне къачузва.
ИкI, Мегьарамдхуьруьн райондин кьил Фарид Агьмедова мукьвал-мукьвал отпускдиз, хирер сагъар хъийиз, хтай женгчияр, абурун хизанар кьабулзава, дерди-гьал чирзава ва герек вахтунда куьмекарни гузва.
Нубатдин сеферда Ф. Агьмедов ЦIийи Филяй тир СВО-дин иштиракчи Абдуллагь Эмировахъ ва адан дах Тельманахъ галаз гуьруьш тухвана. Ада 2018-йисалай Россиядин армиядин жергейра къуллугъзава. Дяведин махсус серенжемда гьа сифте йикъалай командиррин тапшуругъар тамамарзава.
Донбассдин мулкар миллетбазрикай азадзавай нубатдин женгина аскердал залан хирер хьана. Са шумуд варз госпиталда къаткуниз, операцийриз дурум гуниз мажбур хьана. Гила са бубат кIвачел ахкьалтнава. Сагъ хъхьанмазди, ам мад юлдашрин патав хъфида. Женгера къалурай кьегьалвилерай А. Эмироваз «Дирибашвиляй» медаль ганва.
— Абдуллагь хьтин женгчияр халис игитар я. Абуру и кар ва чеб Ватандиз вафалу тирди гьар юкъуз къалурзава,- лагьана Ф.Агьмедова ва лейтенантдив райондин Гьуьрметдин грамота вахкана.- Вири районэгьлийрин патай за викIегь хва тербияламишай диде-бубадиз ва миллетбазрихъ галаз уьтквемвилелди женг чIугвазвай Абдуллагь Тельмановичаз рикIин сидкьидай сагърай лугьузва. Квез гьар са карда куьмек гуз чунни гьазур я, — алава хъувуна райондин кьили.
Хийир Эмиров
