Дяве магьрумвилер, дерт-гъам галай, гьа са вахтунда Ватан душмандикай хуьзвай баркаллу кар я. Дяведин махсус серенжемда, викIегь рухвайри, Ватандин вилик хсуси буржи кьилиз акъуддайла, чпин чанарни къурбандзава. Кьасумхуьруьнви Айдын Агъададашева, Кьулан СтIалдилай тир Рустам Ражабова хьиз. Мукьвара Кьасумхуьруьн 1-нумрадин ва Россиядин Игит Радим Халикьован тIварунихъ галай школайра кьегьал аскеррин шикилар авай кьулар эцигна.
Ефрейтор Айдын Агъададашев лишанчийрин отделенидин гранатометчик тир. Ам Запорожьедин областдин Работино шегьердин къваларив — алай йисан 6-мартдиз, жергедин аскер Рустам Ражабов, мотострелковый батальондин наводчик, — 19-апрелдиз тереф хьана.
Лишанлу ва рикIел хуьнин мярекатра райондин сагьибри, аскеррин багърийри, дустари, жемиятдин тешкилатрин векилри, школайрин коллективри иштиракна.
Кьве школадани рикIел хуьнин мярекатар СтIал Сулейманан райондин кьил Саид Темирханова ачухна.
— Къе Россиядин армияди Ватандин итижар хуьн патал махсус серенжем кьиле тухузва. Душман инсафсузди, фендигарди я. Украина вилик кутуна, США-диз, коллективный западдиз Россия зайифариз кIанзава. Чи викIегь аскерри, Айдын, Рустам хьтин агъзурралди кьегьалри чун ва чи уьлкве хуьзва. Абурун экуь къаматар гьамиша чи рикIера амукьда, — къейдна С. Темирханова.
КIватI хьанвайбуру мемориалдин кьуларин вилик цуьквер эцигна, телеф хьайибуруз рагьмет гъана.
Чи мухбир
