Мукьвара Дагъустанда республикадин жемиятдин машгьур деятель, публицист Алюсет Азизханован “Жемиятдин къуллугъда” (“На службе обществу”) тIвар алай ктаб чапдай акъатнава. Ана республикадин Общественный палатадин ва коммерциядинди тушир “Набат” тешкилатдин (адан регьбер Алюсет Азизханов я) кIвалахдин чешнедалди Дагъларин уьлкведа гражданвилин жемият арадал атунин месэлайрикай суьгьбетзава.
17-декабрдиз Махачкъалада, Р.Гьамзатован тIварунихъ галай Милли ктабханада, ктабдин презентация кьиле фена. Ана РД-дин милли сиясатдин ва динрин крарин рекьяй министерстводин, Общественный палатадин, СМИ-рин векилри, алимри ва масабуру иштиракна. Мярекатдал рахайбуру цIийи ктабдин лайихлувилерикай, жемият па-тал адахъ авай метлебдикай, ктабдин автордикай чпин фикирар лагьана.
Къейд ийин хьи, ктабда авторди жуьреба-жуьре йисара гьар жуьредин темайрай кхьенвай макъалаяр гьатнава. Абурун арада гражданрин азадвал ва ихтиярар хуьнин темадай гьазурнавай кIвалахри кьетIен чка кьазва. Кьилди къачуртIа, авторди гражданвилин жемият вилик финиз, санай масаниз куьчарнавай агьалийрин ихтиярар хуьниз, динрин, миллетрин арада авай амадагвилиз, акьалтзавай несилдиз ватанпересвилин тербия гуниз ва маса крариз талукь месэлаяр къарагъарнава. Хейлин макъалаяр санал кIватIнавай и ктаб уьлкведин, республикадин уьмуьрда эхиримжи 20 йисуз кьиле фенвай гьерекатар, вакъиаяр къалурзавай хроника хьиз кьабулиз жеда.
Алюсет Азизханова регьбервал гузвай “Набат” тешкилатдикай рахадайла, РД-дин милли сиясатдин ва динрин крарин рекьяй министрдин заместитель Арсен Магьмудова къейд авурвал, Советрин Союз чкIайдалай кьулухъ арадал атай четин макъамда и тешкилатди республикадин жемиятдин уьмуьрда важиблу чка кьуна.
“Набат” чпихъ гьакъикъи краралди республикада гражданвилин жемият вилик тухудай къаст авай жегьил общественникриз чешне яз къалуриз жеда”, — лагьана министрдин заместителди.
Мярекатдин эхирдай Алюсет Азизханова презентациядин иштиракчийриз, вичиз ктаб акъудунин карда куьмекар гайи вири юлдашриз сагърай лагьана. Малум хьайивал, “Жемиятдин къуллугъда” ктаб “РусГидро” ПАО-дин Дагъустанда авай филиалдин куьмекдалди чапнава ва ам “Набат” тешкилатдин 20 йис тамам хьуниз бахшнава.
Агьмед Магьмудов
