Дагъустандин физический культурадин ва спортдин министерстводи районра физический культурадин ва спортдин кIва­лах тешкилнавай тегьердиз къимет гун яз гьар йисуз кьиле тухузвай килигун-конкурсдин нетижайрай Сулейман-Стальский район 2-чкадиз, идахъ галаз сад хьиз Кубокдиз, 100 агъзур манатдин кьадарда аваз Грантдиз ва грамотадиз лайихлу хьана. Мадни спорт вилик тухуник лайихлу пай кутунай ва  спортдин проектар кьилиз акъудунин карда куьмек гунай райондин кьил Нариман Абдулмуталибоваз Дагъус­тандин физический культурадин ва спортдин минстерстводин патай Чухсагъул­ малумарнава.

Са тIимил йикъар идалай вилик Сулейман-Стальский райондин кьил Нариман Абдулмуталибова къазанмишнавай шабагьар спортдин, туризмдин ва жегьилрин крарин рекьяй Комитетдин директор На­дыр Эфендиевав шад гьалара вахкана. Мярекатда райондин депутатрин Собранидин председатель Штибег Мегьамедханова, райондин спорткомитетдин директордин заместитель Муслим Селимовани иштиракна…

Грамота ва Кубок вахкудайла Н.Абдулмуталибова райондин спорткомитетдин кIвалахдиз къимет гун тебрик авунихъ галаз сад хьиз, районда физический культура ва спорт вилик тухун патал кьиле тухуз­вай­ кIвалахдикайни рахана. ИкI, эхиримжи­ йисара гзаф хуьрера спортдин объектар, гьа гьисабдай яз мини-футболдин ва волейболдин, аялар къугъвадай ва ворка­ут­-майданар эцигнавайди, и рекьяй кIвалах давамарзавайди  къейдна. Мадни 2021-йис патал спортдин мярекатрин календарда де­гишвилер тун хъувунин, районда спорт (кьилди къачуртIа, футбол) вилик тухун па­тал тайин мурадрихъ элкъуьрнавай программа туькIуьрун лазим тирдини лагьана. Райондин кьили мектебра кIелзавай ая­лар ва жаванар бегьем юзун тавунин (ма­­лоподвижный образ), сагълам уьмуьр пропаганда авунин макьсаддалди спортдин мярекатар кьиле тухунин ва икI мад са жер­ге месэлайрални, кьилиз акъудун пландик квай крарални фикир желбна.

Мукьвара чаз спорткомитетдин директор Н.Эфендиеваз ва адан заместитель М.Селимоваз агалкьун тебрикдай, спорт ви­лик тухун патал районда кьиле тухузвай­ кIвалахдикай, 2021-йисан планрикай абурухъ галаз суьгьбетдай мумкинвал хьана.

— 2020-йисуз районда спортдин 48 мярекат кьиле тухун пландик квай. Гьайиф хьи, тIугъвалдихъ галаз алакъалу яз малу­марай карантин себеб яз абур вири кьилиз акъуддай мумкинвал хьанач. Кьуршахар кьунай, дзюдодай, самбодай районда спорт­дин акъажунар кьиле тухуз, гьакIни республикадин дережадин мярекатрани иштиракиз хьанач. ЦIи футболдай ва мини-футболдай, волейболдай, теннисдай, шахматрай — вири санлай 29 мярекат кьиле тух­вана. Ибурулай гъейри, чна жаванрин иштираквал аваз 17 мярекат кьиле тухун план­дик кутунвайди тир. Абурукай анжах 4 (“Михьи гъилер”, общественный чкайра маскаяр, бегьлеяр, антисептикар паюниз талукь  тирбур ва икI мад) акция кьиле тухудай мумкинвал хьана, — къейдна вичин рахунра Н.Эфендиева.

РикIел хкин: 2019-йисан нетижайрай килигун-конкурсда Сулейман-Стальский районди 1-чка кьунай. ЦIи лагьайтIа, дугъриданни, тIугъвалди вири крар кьулухъ яна, планар чIурна.

Н.Эфендиеван гафарай малум хьайивал, Грант яз ганвай 100 агъзур манатдихъ министерстводай спортдин тадаракар хкидайвал я.

За районда спорт вилик тухуник пай кутазвай ксариз ва вири агьалийризни алукьзавай ЦIийи йис рикIин сидкьидай тебрикзава. Къуй гележегда хайи ерийра спорт мадни гьуьндуьр дережайриз акъатрай, адал машгъул жезвай спортсменрин кьадар артух ва нетижаярни чи рикIер мадни шадардайбур хьурай!

Рагнеда  Рамалданова