Дагъустандин къенепатан крарин министерстводин пресс-къуллугъди хабар гузвайвал, алай вахтунда Урусатда, гьа жергедай яз Дагъустандани, лутуйрин чилина гьатзавай агьалийрин кьадар гзаф жезва. Абуру инсанривай пулдин такьатар къакъудун патал гьар жуьредин къайдайрикай менфят къачузва: мобильный алакъадин телефонрикай, интернетдикай, “Мобильный банк” къуллугъдикай, “Авито” сайтдикай… Идалай гъейри, лутуйри пул къакъудунин карда вирусрин куьмекдалди телефон кардикай хкуддай программаярни ишлемишзава.
Эгер квез малум тушир нумрадай зенг авуна куь банкунин картадин ва я счетдин нумраяр, логинарни паролар лугьун тIалабзаватIа, ахьтинбуруз са жуьредин малуматни гумир. Лутуйри зенгер авурла, чеб банкунин ва я тахьайтIа государстводин тайин са органдин векилар я лугьуз, табзава ва чпиз герек малуматар кIватIиз алахъзава. Мукъаятвал квадармир. Куьн лутуйрив алцурариз тамир!
Эгер квез куь банкунин картадин делилар (мисал яз, пароль) маса ксариз чир хьанвайди хьиз аватIа, куьн яшамиш жезвай чкада авай банкунин отделенидиз хабар ая.
«Лезги газет»
