8-февралдиз, Россиядин илимдин юкъуз, РД-дин образованидин ва илимдин министерстводин патав гвай «Республикадин образованидин центрадин» майдандал (ГБОУ РД РЦО) Вирироссиядин «Илимри  жегьилар таъминзава» конкурсдин мярекатрин комплекс шад гьалара агалунин мярекат кьиле фена.

Конкурсда Россиядин Федерациядин 17 субъект­дай, гьа жергедай яз Да­гъустандай, Татарстандай, Башкортостандай, Кемероводин ва Москвадин областрай тир 1000-далай гзаф бажарагълубуру иштиракна.

Конкурсдин очный паюна 500-далай гзаф ксари, гьа гьисабдай яз муаллимри, студентри ва мектебра кIелзавай аялри иштиракна – абуру 38 секциядин сергьятра аваз чпин ахтармишунардай проектар ва  илимдин кIвалахар  майдандиз акъудна.

Хкягъунин нетижада конкурсдин гъалибчияр ва пишкешрин сагьибар тайинарна, абурун тIварар государстводин информациядин ресурсда твада. Ида абуруз,  вузрик экечIдайла ва стипендия къачудайла, куьмекда.

Мярекатда иштиракай РФ-дин  Госдумадин депутат Нурбаганд Нурбагандова къейд авурвал, ихьтин  конкурсар кьиле тухунин важиблувал екеди я – абуру жегьилрин илимдин рекьяй гьевеслувал хуьзва ва гележегда абурун бажарагъ вилик тухун патал шартIар тешкилзава.

Илимдин фестивалдин макьсад  жегьилар ахтармишунардай кIвалах­рал желб авун ва  илим вирибурун тIем акакьдайди авун я лагьайтIа, жеда.

Конкурс агалунин мярекатдал  гъалибчийрив ва пишкешриз лайихлу хьайибурув шабагьар вахкана. Шабагьриз лайихлу хьайибурун арада Мегьарамдхуьруьн райондин мектебра кIелзавай аяларни ава. ИкI, райондин информациядин къуллугъди хабар гузвайвал, Советский хуьруьн мектебдин 4-классда кIелзавай Мекке Велиховади сифтегьан классрин арада 1-чка, Асият Гьажиевади (5-класс) Дагъустандин тарих­дай 1-чка, Гьашим Мамедгьуьсейнова (8-класс) физикадай 3-чка кьуна. Хважа-Къазмайрин мектебдай тир Алия Гьамзабегова хайи чIаларай 3-чкадиз лайихлу хьана.

Хъсан нетижайрай Мегьарамдхуьруьн райондин образованидин управленидин начальник Улубег Абейдуллае­ваз РД-дин образованидин ва илимдин министерстводи Чухсагъулдин чар гана.

ГьакIни малум хьайивал, Ахцегь райондин Къурукаларин юкьван мектебдин 10-классда кIелзавай Алина Керимовади «Ахцегьрин гугурт квай чешмеяр» месэладай вичин проект хвена ва ам финалдиз акъатна. Химиядин ва биологиядин муаллим Мафи Гъазалиевадин гъилик чирвилер къачузвай ада жюридик квайбуруз Къурукаларин гугуртдин чешмейрал гьазурзавай «Ахты-су» цин дад  аквадай мумкинвал гана.

РД-дин образованидин ва илимдин министерстводи, Дагъустан Республи­ка­дин муаллимрин ассоциацияди, «Рес­­публикадин образованидин центр» ГБОУ-ди  ва РФ-дин халкьдин образо­ванидин ва илимдин работникрин проф­союздин Дагъустанда авай тешкилатди санал тешкилнавай «Илимри жегьилар таъминзава» конкурсдиз алай йи­суз «Вирироссиядин ахтармишунардай кIвалахрин ва проектрин конкурс»  лагьай дережа ганва.

Саида Мурадова