Хайи чIаларин международный йикъан сергьятра аваз, СтIал Сулейманан райондин аялриз мектебдиз фидай яшдив агакьдалди чирвилер гунин идарайрин (бахчайрин) арада муниципальный «Хайи чIалал виридалайни хъсан тарс» конкурс кьиле фена. Муниципалитетдин информациядин къуллугъди къейдзавайвал, конкурс тешкилунин макьсад гъвечIи аялрин итиж хайи чIалал желб авун, адал бицIекрин рикI ацукьдайвал авун, аялриз чпин хайи чIал ва меденият хъсандаказ чир хьун лазим тирди рикIелай ракъур тавун, гьакIни муаллимрин бажарагъ ва мумкинвилер ачухарун я.
Истемишунрин бинедаллаз иштиракчийри милли адетриз, литературадин яратмишунриз ва сеняткарвилерин культурадиз талукь ачух тарсар кьиле тухвана. Нетижада конкурсда гъалибвал Агъа СтIал-Къазмайрин аялрин «Чубарук» бахчадин тербиячи Мильвара Рашидовади къазанмишна. Кьасумхуьруьн 3-нумрадин бахчадин тербиячи Сарижат Ильясбегова, Кьулан СтIалрин бахчада кIвалахзавай Вера Исламова ва Нарья Нуралиева пишкешрин чкайриз лайихлу хьана.
Саида Мурадова
