Чи ватанэгьлияр — гьар сана
Уьмуьрдин шартIар, гьалар себеб яз, чи хейлин ватанэгьлияр уьлкведин жуьреба-жуьре регионра, къецепатан гьукуматра яшамиш жезва. Абуру чеб медицинада, илимда, алишверишда, спортда, сиясатда ва маса хилера гъавурдик квай пешекарар, регьберар тирди субутзава. Ихьтинбурукай сад алай вахтунда Белоруссияда яшамиш жезвай ва ана тренервиле, юриствиле кIвалахзавай Раид Зикруллаевич Меликов я.
Ам 1976-йисан 11-июлдиз Азербайжандин КцIар шегьерда дидедиз хьана. 10-класс КцIарин мектебда куьтягьна, 1992-йисуз Белоруссиядин меркезда яшамиш жезвай вичин чIехи стхадин патав фена, гьана 11-классда кIел хъувуна.
1993-1997-йисара адакай дзюдодай Белоруссия Республикадин милли командадин член хьана. Ам Белоруссиядин спортдин мастер я. Спортдал машгъул хьунихъ галаз сад хьиз, Раид Меликова кIелунин, чирвилер къачунин месэлани кьулухъ вегьенач. 2000-йисуз ада Белоруссиядин вуздин юридический факультет куьтягьна. Спортдал гзаф рикI алайвиляй ада гуьгъуьнлай физкультурадин рекьяйни кьвед лагьай кьилин образование къачун кьетIна.
Дзюдодин тренервиле ада 2006-йисалай кIвалахзава. 2003-йисуз вичин ватандиз хтана, эвленмиш хьана. Алай вахтунда ватанэгьлидин хизанда хвани руш чIехи жезва.
Тренервал авунилай гъейри, Р.Меликова гьа са вахтунда риэлтор-юрист язни кIвалахзава. Дзюдодай адан гъилик вердишвилер къачузвай жаванрикай гзафбурухъ агалкьунар хьанва, абуру жуьреба-жуьре акъажунра неинки чпин викIегьвал, гьакI муаллимдин-тренердин зегьметни бегьерлу тирди субутзава. ИкI, ватанэгьлидин ученикрин арада спортдин мастерарни пайда хьанва.
Вичин ватандихъ галаз Раид Меликова датIана алакъаяр хуьзва. “Зи диде-буба, багърияр вири КцIара яшамиш жезва. Хизанни галаз саки гьар йисуз КцIариз хъфизва. И йисуз хизан гьатта са вацра ватанда хьана. Жуваз яргъалди акъваздай мумкинвал гьамиша жезвач. Кьисметди хайи чиливай яргъариз акъуднаватIани, чна чи чIал, адетар квадарзавач. КIвале чи хизан анжах лезги чIалал рахазва”, — ватанпересвилелди лугьузва Раид Меликова.
Къейдзавайвал, ада Минскда яшамиш жезвай лезгийрихъ галазни дуствилин алакъаяр хуьзва. Гьар сана авай ватанэгьлийрихъ анжах агалкьунар хьурай!
К.Ферзалиев
