Гьукуматди уьлкведин мектебар алай аямдин образованидин контентдалди таъминарун патал миллиард манат чара ийида. Уьлкведин резервдин фондунай тир и такьатрихъ мектебар умуми образованидин 1-11-классра чирзавай предметриз талукь рекъемрин конспектралди, гьакIни вири ученикар патал лазим интерактивный материалралди — къугъунралди, тестералди, виртуальный лабораторийралди, архивдин делилралди ва мультимедийный картайралди таъминарда.
Талукь тир къарардал РФ-дин Гьукуматдин Кьил Михаил Мишустина 2020-йисан 15-декабрдиз къул чIугуна. Гьукуматдин сайтда авай малуматда къейднавайвал, ида чирвилер гунин гьерекат итижлуди ва гьевесламишдайди, кьилинди лагьайтIа, — алай аямдин мектебра кIелзавай аялрин истемишунриз жаваб гудайди авун лазим я.
Къарарда лагьанвайвал, бюджетдай чара ийизвай пулдин такьатар тайинарнавай рекьериз ва нетижалудаказ харж авунал РФ-дин просвещенидин министерстводи гуьзчивалда. Тамамарнавай кIвалахдин нетижайриз талукь гьахъ-гьисабар Гьукуматдив 2021-йисан 1-февралдалди агакьарун лазим я.
Алай йисан октябрдиз бязи СМИ-ри хабар гайивал, «Рекъемрин экономика» милли программадик акатзавай «Рекъемрин регион» федеральный проектда образование виликди тухунин месэлайриз 6 миллиард манатдин кьадарда аваз такьатар харж авун фикирда кьунва. И кьадардикай федеральный бюджетди 370 миллион манат, регионрин бюджетри — 5,67 миллиард манат харждайвал я.
Мектебра кIелзавай аялриз алай аямдин образованидин программаяр ишлемишдай мумкинвал хьуниз талукь месэла 17-декабрдиз Россиядин Президент Владимир Путинахъ галаз хьайи пресс-конференциядални хкажнай.
Гьукуматдин Кьили къейд авурвал, 2021-йисуз уьлкведин вири мектебра виниз тир йигинвал авай интернет пайда жеда. Президентди талукь тир идарайрин векилриз образованидин идараяр технологиядин жигьетдай гьазур тахьунихъ галаз алакъалу месэла гьялунин гьакъиндай къайгъу чIугуниз эвер ганай.
«Лезги газет»
