6-7-апрелдиз Московский областда спортдин шинкиокушинкай-каратэ жуьредай Тарасовский хуьруьн администрациядин кьилин кубок патал регионрин уртах турнир кьиле фена. Гьар йисуз кьиле тухузвай акъажунра цIи РФ-дин жуьреба-жуьре шегьеррайни регионрай 250 спортсменди чпин алакьунар къалурна.

Кьурагь райондин администрациядин пресс-къуллугъди хабар гузвайвал, турнирдин кьилин тешкилатчи Кьурагь райондин «Кумух» клубда виликдай спортдал машгъул хьайи викIегь спортсмен, чIулав чIулунин сагьиб, каратэдай спортдин устад Ислам Рустамов я.

Турнирда Кумухрин мектебдин спортсменрини гьар йисуз иштиракзава. Машгьур акъажунра иштиракай дагъви спортсменар медалар гваз хквезва. Чешмеди кхьизвайвал, и сеферда 10 йисан яшда авай Халид Султанов тафаватлу хьана. Ада заланвилин 30 килограммдин дережада кьиле тухвай вад бягьсина гъалибвал къачуна.

Акъажунрин тешкилатчийри жаван каратист кубокдалди, медалдалди ва грамотадалди къейдна.

Чна Халидаз ва адан тренер Заир Рамазановазни и агалкьун мубаракзава.

«Лезги газет»