Куьмек гана кIанзавач
США-дин махсус векил Э.Абрамса ихтилатнавайвал, Венесуэладин президент Николас Мадуродиз куьмек гун Россиядиз багьаз акъвазда. Идан гьакъиндай «CNN» чешмеди хабар гузва.
Адан гафарай, Мадуродин асул терефдарар хьиз майдандиз экъечIнавай Москвадин ва Гаванадин крариз Вашингтонди фикир тагана тадач. “Чна абур жаваб гуниз мажбурда. Идан гьакъиндай США-дин президентдин администрацияда авай кьилин чиновникрикай садни шаклу жезвач”, — лагьана ада.
Венесуэлада США-дин векил Абрамса Мадуро йисан къене президентдин къуллугъдал аламукьунал шак гъизва. Ада къейдзавайвал, Мадуроди ва адан къвалав гвайбуру чпин вахт алатнавайди яз гьисабайла, президентди гьукуматдин кьилин къуллугъ гадарда. Акси дуьшуьшда, ам президентвиляй акъудуникай военныйри фикирда.
Абрамса Венесуэладиз куьмек гунай США-ди Россиядиз акси санкцияр кардик кутун мумкин тирди къейдна. А серенжемар Россиядин экономикадиз талукь жеда.
27-мартдиз Трампа Россиядивай Венесуэладай «экъечIун» истемишнай. Гуьгъуьнлай Москвада и месэладиз талукь яз къейд авурвал, Каракасда Россиядин аскерри гьукумдин разивилелди иштиракзава.
Гуьзчивал артухарда
Онлайн къайдада ва тадаракламиш тавунвай майданрал чирвилер гунал къадагъа эцигуналди, ГИБДД-диз автошколайрал гуьзчивал артухардай фикир ава. Идакай проектриз талукь федеральный порталда чапнавай документда къейднава.
Россиядин Президент В.Путинан къарардалди ГИБДД-диз автошколайриз лицензияр гудай ва, къайдайрал амал тавуртIа, абурун кIвалах акъвазардай мумкинвални жедай ихтиярар гуда. Къурулушди автошколайри материалрин базадиз талукь истемишунрал амалзавай гьални ахтармишда.
Автошколайрин регионрин уртах ассоциациядин президент Т.Шутылевади малумарайвал, ихьтин серенжемди “инсанар рекьидай школаяр” базардай акъуддай мумкинвал гуда. Чешмеди кхьизвайвал, Минпросвещениди ва Рособрнадзорди теклифдин тереф хвенва.
НАТО-дин яракьар
“Business Insider” изданидин пешекарри НАТО-дин уьлквейрин яракьламиш хьунин жуьреяр тайинарна. Къейдзавайвал, абур Россиядихъ галаз кьиле фин мумкин тир дяведа ишлемишда.
Яракьрин сиягьдик Америкадин вад лагьай несилдин F-35 Iightning II стелс-истребитель ква. Авторрин фикирдалди, муькуь уьлквейрилай техникадин рекьяй ихьтин вини дережадин самолет арадал гъиз алакьнавач.
Сиягьда Европадин уьлквейри санал арадал гъанвай Eurofighter Typhoon истребителни къейднава. Пешекарри ам Россиядин гьужумдай Су-25 самолетдив гекъигнава. Фикирдиз къачунвай дяведин тадаракрик бомбаяр вегьедай B-52, B-2 Spirit ва B-1B Iancer, P-8A Poseidon самолетарни ква. И жуьредин яракьрик Италиядин, Франциядин, Испаниядин, Норвегиядин ва Даниядин дяведин гимиярни кутунва. Америкадин АН-64 Apache вертолетдин, немсерин Ieopard 2 танкунин, ПВО-дин Patriot системадин ва цин кIаникай фидай луьтквейрин тIварарни кьунва.
Пенсияр хкажна
1-апрелдилай Россияда яшайишдин (социальный) пенсияр 2 процентдин хкажнава. Идакай “REGNUM” чешмеди хабар гузва.
Пенсиядин юкьван кьадар 182 манатдин артух хьанва. Гила санлай и пенсиядин кьадар 9266 манатдикай ибарат я. Уьлкведин зегьметдин ва яшайишдин рекьяй хуьнин министерстводи малумарайвал, индексацияди саки 4 миллион пенсионеррин такьатар хкаждай мумкинвал гузва. Индексация набут аялриз ва аял чIавалай I группадин набутриз гузвай пенсиядин такьатризни талукь жеда. Абур 268 ва 270 манатдин артухарда, санлай абурун кьадар 13674 ва 13812 манат жеда.
Пенсия артух хъувунин гьакъиндай алай йисан февралдиз РФ-дин Президент В.Путина Федеральный Собранидиз ракъурай Чарче къейднавай.
КIвалахдик квачирбурун страховой пенсияр январдилай 7,05 процентдин артухарна. КIвалахзавайбуруз индексация талукь жезвач, абуруз августдин вацра, кIвалахдин вахтунда кIватI хьайи алава баллар фикирда кьуна, артух хъийида.
Алай йисан 1-октябрдилай военный пенсийрин кьадарни 6,3 процентдин артух жеда.
Гьазурайди — Куругъли Ферзалиев
