И йикъара Сулейман-Стальский райондин центрада «Михьи район» серенжемдин сергьятра аваз, республикадин рекьик акатзавай «Кьасумхуьр-Цмур» мулкар михьи авуна. Идакай «Лезги газетдиз» райадминистрациядин пресс-къуллугъди хабар гузва.

Бигердин серенжемда райондин кьилин везифаяр тамамарзавай Лацис Оружева, Кьасумхуьруьн администрациядин къуллугъчийри, «Сад тир Россия» партиядин векилри, Кьасумхуьруьн телевиденидин журналистри, волонтерри ва райондин жегьилрин парламентдин векилри иштиракна.

Чешмеди къейдзавайвал, республикадин «Кьасумхуьр-Цмур» рекьин Алидхуьруьн мулкарик акатзавай чкайра зирзибилрин къанунсуз хъурт арадал атанвай. Исятда къуватда авай къанундал амал авуналди, ихьтин амукьаяр махсус чкайриз ва абур гьялдай заводриз тухун лазим я. Амукьаяр кIватIунин, мулкар дуланажагъдин зирзибилрикай михьунин кIвалахар районда вахт-вахтунда тухузва.

Санлай къачурла, гатфарин нубатдин субботникда 50-далайни гзаф ватанэгьлийри иштиракна. Нетижада къайдасуздаказ арадал гъанвай зирзибилрин хъуртар тергна.

Алава хъийизвайвал, мукьвара «Къацу километрияр» серенжемдин сергьятра аваз райондин муькуь хуьрерани мулкар абадунин, къелемар цунин кIвалахар кьиле тухуда.

 «Лезги газет»