COVID-19 азардиз акси рапар гила 12-далай 17 йисал къведалди яшара авай жаванризни ядайвал я. Идакай РФ-дин здравоохраненидин министр Михаил Мурашкоди, Пермь шегьердиз фейила, гайи суалдиз жаваб яз хабар гана…
Россиядин здравоохраненидин министерстводи 24-ноябрдиз коронавирусдиз акси “Спутник М” вакцина регистрация авуна. Ам 12-далай 17 йисалди яшара авай жаванриз ягъун патал ишлемишда. Вакцина кьве паюникай ибарат я, яни рапар, арада 21 югъ аваз, кьве сеферда ягъун герек къвезва. Азардин вилик пад кьун паталди тир и серенжем аялрин диде-бубайрин ва я абурун векилри, гьакIни жаванди вичи, адан 15 йисалай виниз ятIа, гуьгьуьллудаказ разивал гуналди кьилиз акъудда.
РикIел хкин: виликдай М.Мурашкоди алай йисан эхирдалди “Спутник М” вакцинадин 150 агъзур доза гьазуруникай ва адакай менфят къачудай мумкинвал хьуникай хабар ганай.
* * *
Россиядин здравоохраненидин министерстводи хабар гузвайвал, вакцина сифте нубатда яргъалди сагъариз тежезвай (хронический) азарар авай аялриз ягъун лазим я.
* * *
Гамалеян тIварунихъ галай эпидемиологиядин ва микробиологиядин Центрадин директор Александр Гинцбурга аялар патал тир “Спутник М” (“Гам-КОВИД-Вак М”) вакцинадиз талукь яз къейд авурвал, “М” — гъвечIибуруз лагьай гаф я.
Рагнеда Рамалданова
