Дагъустандин здравоохраненидин министерстводин сайтда хабар ганвайвал, коронавирусдин “омикрон” штамм кваз хьунай шак физвай азарлуяр Каспийскдин центральный больницадиз рекье твадайвал я. Идакай коронавирусдин азардихъ галаз женг чIугвадай Оперативный штабдин заседанидал РД-дин здравоохраненидин министрдин везифаяр вахтуналди тамамарзавай Татьяна Беляевади хабар гана.
Каспийскдин центральный больницада коронавирусдин цIийи штамм кваз хьун мумкин тир азарлуяр къаткурун патал кьилдин 3 бокс-палата чара авунва. Т.Беляевадин гафаралди, медицинадин и идара хкягъун дуьшуьшдин кар туш. Ам аэропортуниз мукьва я, и кардини садакай масадак акатдай азардин вилик пад кьаз, ам республикада чукIун тавуниз куьмекда.
* * *
Виридуьньядин здравоохраненидин организациядин (ВОЗ) эхиримжи делилралди, коронавирусдин “омикрон” штамм дуьньядин 57 уьлкведин агьалийрик квайди тестикь хьанва. Экспертри гьисабзавайвал, и штамм коронавирусдиз акси рапар янавайбурук ва азарлу хьайибурук акатунни мумкин я.
ВОЗ-ди мадни къейдзавайвал, эхиримжи вахтара COVID-19 азардин “дельта” штамм виридалайни гзаф акатзава.
«Лезги газет»
