15-майдиз Кьурагьа райондин администрациядин физический культурадин ва жегьилрин крарин рекьяй отделди ДЮСШ-дихъ галаз санал мини-футболдай жаванрин (2005-йисал къведалди) арада Гъалибвилин йикъаз талукьарнавай турнир кьиле тухвана. Мини-футбол машгьурунин мураддалди Кьиблепатан Дагъустандай иниз виридалайни хъсан 5 командадиз эвер ганвай. Идакай чи газетдиз Кьурагь райондин администрациядин пресс-къуллугъди хабар гана.
Турнирда иштиракзавай командаяр судьяйри кьве патал пайна. Сад лагьай дестеда кIвенкIвечивал къазанмишун патал “Кьурагь”, “Мегьарамдхуьр”, “Кьасумхуьр” ва кьвед лагьай дестедани “Докъузпара”, “Дербент шегьер” ва “Ахцегь” командаяр “гуьруьшмиш хьана”. Гьар са дестеда гъалиб хьайи командаяр финалда ва 2-чкаяр кьур командаярни 3-чка патал къугъун лазим тир.
Къугъунар, жаванрин жегьилвилизни килиг тавуна, лап къизгъиндаказ кьиле фена. ИкI, “Кьурагь” — 1, “Докъузпара” — 2 ва “Кьасумхуьр” команда 3-чкайриз лайихлу хьана. Гъалиб хьайи командайриз кубокар, медалар, грамотаяр ва пулдин пишкешар гана. Турнирда виридалайни хъсандиз къугъвайбур — И.Къурбанисмаилов, А.Кьасумов, И.Таибов (Кьурагь), Ж.Сулейманов (Кьасумхуьр), А.Надиров (Докъузпара) турнирдин тешкилатчийри пишкешралди къейдна.
Шад мярекатдал Кьурагь райондин физический культурадин ва жегьилрин крарин рекьяй отделдин начальник Р.Рамазанова районэгьлийрив — спортдин ветеранар тир Гь.Гьабибуллаевав, Ю.Мисриевав, Э.Рамазановав ва Гь.Гьамзабеговав физический культурадин ва спортдин хиле 40 йисалай виниз зегьмет чIугунай РД-дин Минспортдин ва Кьурагь райондин администрациядин патай чухсагъулдин чарар ва спортдин формаяр вахкана. Райондин администрациядин патай пишкешдиз, регбидай республикадин хкянавай командадик кваз еке агалкьунар къазанмишуниз килигна, и мукьвара Россиядин спортдин мастервилин тIвар ганвай Эмиля Таибовани лайихлу хьана.
«Лезги газет»
