Панголин
Аламатдин акунар авай гьайванрикай сад панголин лугьудай гъвечIи вагьши я. Броненосецдизни муравьеддиз ухшар и гьайвандин беден кIеви, юзадай хъуьруьшри кьунва. КIвалин къавал жедай сахсияр хьиз, сад муькуьдал алгъанвай хъуьруьшрин къерехар гьамиша хцибур я. Анжах чинал, кIвачерин кIанерал ва руфунал чIар ала.
Абур ачух чкайрани, тропикрин тамарани яшамиш жезва. Панголинар йифен гьайванар я. Абуру цеквер ва маса гьашаратар незва. Йикъан береда абур дерин тIеквенра ва я тарарин хъалхъамра чуьнуьх жезва.
Бязи чIехи панголинрин бедендин заланвал 27 килограммдив агакьзава, яргъивал — 88 сантиметрдив. Абур рехивални рагъулвал какахьай рангунинбур жеда.
И вагьшийриз цихъай кичIедач, абуру еке гьевесдивди сирнавда. Итижлу делил ам я хьи, вичин беден бязи зиянкар гьашаратрикай (паразит) михьун патал панголинди цекверикай менфят къачузва. Цекверин кIунтIунал акьахна, бедендал алай хъуьруьшар ахъайна, цекверив кIасиз тазва. Нетижада цекверин кислотади зарарлу гьашаратар рекьизва.
«Лезги газет»
