16-майдиз Сулейман-Стальский райондин ЦIийи Макьарал са шумудра РД-дин ва Россиядин чемпион, 4 сеферда Европадинни дуьньядин чемпион, спортдин лайихлу мастер, 2001-2002-йисара “Россиядин лап хъсан спортсмен” тIварцIин Сагьиб Рамидин Къазимегьамедован призар патал армрестлингдай республикадин дережадин турнир кьиле фена.
Ам ЦIийи Макьарин хуьруьн администрациядин куьмекни галаз райондин спортдин, туризмдин ва жегьилрин комитетди тешкилнавай. Турнирдин спонсорар Р.Къазимегьамедован хизан, ярар-дустар, алишверишдин “Ново-Мака” кIвал тир.
Турнирда республикадин шегьеррайни районрай атанвай 100-дав агакьна спортсменри иштиракна. Абурун арада республикадин, Россиядин, Европадин ва дуьньядин чемпионарни призерар авай.
Къизгъиндаказ кьиле фейи акъажунра жегьилрин арада дуьньядин чемпион Замир Бабаева (65 кг, Сулейман-Стальский район), дуьньядин чемпион Агьмед Къурбанова (80 кг, Сулейман-Стальский район), спортдин мастер Аким Абдулаева (95 кг, Табасаран район), Балабег Къарабегова (95 кг-дилай гзаф, Сулейман-Стальский район) 1-чкаяр кьуна.
Турнирдин эхирдай спортсменри абсолютный категориядай акъажунар тухвана. 17 спортсмендин арада Агьмед Къурбанов гъалиб хьана.
Турнирда 1,2 ва 3-чкаяр кьур спортсменриз медалар, кубокар, пулдин призар ва талукь дережайрин дипломар гана.
Хазран Кьасумов
