И йикъара Сулейман-Стальский райондин Герейхановский 2-нумрадин ДЮСШ-да жаван спортсменрин арада азаддаказ кьуршахар кьунай заланвилин ирид дережадай кIвенкIвечивилин акъажунар кьиле фена. Идакай «Лезги газетдиз» райадминистрациядин пресс-къуллугъди хабар гана.

Райондин 90 йисан юбилейдиз талукьарнавай акъажунрин кьилин макьсад спортдин и жуьре районда мадни машгьурун, аялрин арада дуствал мягькемарун я.

Турнир шад гьалара ачухунин мярекатда райондин кьилин заместитель Лацис Оружева, райондин общественный палатадин председатель Алимет Мейланова ва маса жавабдар къуллугъчийри иштиракна.

Агалкьунар хьайи жаван пагьливанриз грамотаяр ва пулдин пишкешар гана.

 «Лезги газет»