Ахцегь райондин кьил Осман Абдулкеримован теклифдалди райондин мектебрин чIехи классра кIелзавайбурухъ галаз АТК-дин къуллугъчийри экстремизмдизни терроризмдиз акси профилактикадин серенжемар кьиле тухун давамарзава.
«Лезги газетдиз» райондин администрациядин пресс-къуллугъди хабар гузвайвал, и йикъара АТК-дин векилри КьакIарин мектебда терроризмдизни экстремизмдиз аксивал къалуруниз талукь темадай суьгьбетар кьиле тухвана. Ана райондин АТК-дин аппаратдин къуллугъчияр тир Шимсидин Арухова, Играмудин Мегьамедова, Ахцегь авай РД-дин муфтиятдин марифатдин отделдин векил Хуснудин Ашуралиева иштиракна.
Серенжемдин вахтунда мугьманри мектебдин чIехи классра кIелзавайбуруз алай вахтунда терроризмди гьихьтин четин, мусибатдин месэлаяр арадал гъизватIа ихтилатна. Гьа са вахтунда интернетдикай менфят къачудайлани жегьилри чеб гьикI тухун лазим ятIа, гьадакайни суьгьбетна.
«Лезги газет»
