Чи уьлкведин Президентди нубатдин гъилера Федеральный Собранидиз Чар раижна. Владимир Пу­тина ана уьлкве яшайишдин ва экономикадин ж­игьет­дай вилик финин месэлайриз кьетIен фикир ганва. И барадай кьилиз акъудна кIанзавай везифаяр идалай вилик майдин указда, милли проектра ачухарнавайди­ я. Абурун асул макьсад уьлкведин ви­ри несилрин уьмуьрдин ери хкажунихъ элкъуьр­нава. Ихьтин дережайрив агакьарун патал Россия­ ви­ри терефрихъай­ пайгардаказ вилик тухун чарасуз­ я. Президентди къейдзавайвал, и мурадар кьилиз акъудун патал чахъ бес кьадардин пулдин такьатар­ ава. Абур цавай аватна гъиле гьатнавайбур туш, абур чи ватандашри — ви­ри уьлкведи гьа­къисагъ зегь­метдалди къазанмишнавайбур я. ГьакI хьайила­, абурукай Россиядин девлетар артмишун, чи хизанрин гьал-агьвал хъсанарун­ патал менфят къачун ге­рек я. В.Путина тагькимарай­вал, хъсанвилихъ де­гишвилер жезвайди инсанри мукьвал тир вахтара­ гьисс авун лазим я. Граждан­рин­ фикирар вилив хуь­налди, къведай йисан эвелра милли проектар бажар­мишуниз талукь кIвалахдин нетижаяр кьадайвал, а нетижайрилай аслу яз гьукум­дин вири дережайрин къурулушрин кIвалахдизни къимет гудайвал я.

Президент вичин Чарче образованидин месэлайрални акъвазнава. Кьилди къачуртIа, ада къейд­завайвал, уьлкведа тахминан 200 агъзур аялди дуьзгуьн шартIар авачир школайра кIелзава. Чпин веледар ихьтин татугайвилерал расалмиш жезвайла, адалатлувиликай, виридаз сад хьтин мумкин­ви­лер гуникай ийизвай ихтилатрикай диде-бубайриз­ гьяз къвезвач, ихьтин рахунри абур гьатта ажугълу­ни ийизва. Президентди и месэладал регионрин кьилерин фикир желбнава.

Дагъустандани типовой школайрин сан 496-далай алатнавач, амайбур алай аямда чирвилерин ор­ганизацийривай ийизвай истемишунриз жаваб гуз­вайбур туш. 133 школа чкIидай гьалда ава, 131 да­­­рамат лап куьгьне хьанва. 546 школадин дарама­тар капитальнидаказ ремонт авунин чарасузвал ава.

Дугъри я, Дагъустандин Кьил В.Васильеван тек­лифдалди туькIуьрнавай “100 мектеб” проектдал­ асаслу яз, 2019-йисуз республикадин образованидин 150 идарада ремонтдин кIвалахар кьиле тухуда­.

Чаз малум тирвал, уьлкведа “Земский духтур” программа кардик ква. Президентди, гьадалай чешне къачуна, “Земский муаллим” программани кьилиз­ акъудун, адал асаслу яз хуьрерин чкайра, гъвечIи шегьерра кIвалахиз физ кIанзавай педагогриз миллион манат пул чара авун теклифзава. Им, гьелбетда­, хъсан меслят я, гьа са вахтунда школайра чир­вилер къачудай къулай шартIарни яратмишун, же­гьил несил хуьрера акъваздайвал, са бубат хьайи­тIани пул къведай кIвалахдин чкаяр тешкилун герек я.

Президентди вилик эцигнавай месэлаяр тIем гъиз жедайбур я, анжах обществодин вири къуватар сад авурла.

Даир Бейбалаев