Ватан хуьзвайбурун суварин шадлухдай Ахцегьрин РДК-да берекатлу суфраяр ачухна.

“Ахцегь район” МР-дин кьил Осман Абдулкеримован ва администрациядин патай ветеранриз сувар тебрикна. Мярекат  муниципалитетдин кьилин заместитель Мегьамед-Рауф Гъаниева ачухна.

— Чи бубайри Ватандин азадвални аслу туширвал патал къалурай   игитвилер чна садрани рикIелай ракъурдач. Абурун рехъ давамарзавай халис ватанпересар яз, чазни хайи Ватан гзаф кIанда. Исятда чи вилик акъвазнавай кьилин везифа акьалтзавай несил ватанпересвилин руьгьдаллаз, зегьметдал рикI алаз тербияламишун я, —  лагьана ада.

Гьевескарар Фикрет Башировани Эмирсултан Бигеева “За Россиядиз къуллугъзава” мани тамамарайдалай кьулухъ гаф райондин пенсионеррин советдин председатель Къардаш Мамалиев рахана.

Рубаба Къурбановадини Исмаил Ризаханова “Зун армиядиз физва, диде” мани тамамарайдалай кьулухъ военкомиссар, подполковник Рафик Мегьамедова яру аскер, Ватан хуьзвайбурун сувар арадал атунин тарихдикай ва алай макъам­да чи армиядин агалкьунрикай маракьлу суьгьбетна.

Мярекатдал гьакI Ахцегь пог­ранчастунин командир, подполковник Рафаэль Хисаметдинов, рай­ад­министрациядин кьилин заместитель Роберт Гьамзаев, Афгъанистандин дяведин ветеран Севзихан Мирзеханов, тарихдин музейдин ди­­ректор Агьмед Дагъларов, и цIа­рарин автор ва маса юлдашар рахана.

Дашдемир Шерифалиев

______________________________________________

Мегьарамдхуьруьн райондин культурадин центрада Ватан хуьзвайбурун йикъаз талукьарнавай шадвилин мярекатда райондин ва хуьрерин администрацийрин векилри, депутатри, идарайрин, карханайрин руководителри, школайрин коллективри иштиракна.

Мярекат ачухуналди ва кIватI хьанвайбуруз сувар тебрик авуналди, райондин кьил Фарид Агьме­до­ва­ къейдна: “Къенин сувар чи гьар са хизандиз, агьалидиз талукьди я. Чна къе кIани Ватандин сергьятар  хуьзвай, армиядин жергейра вафалувилелди къуллугъзавай ксар ри­кIел гъизва. Абуру чаз ислягь зегь­метдал­ машгъул жедай, экономика вилик ту­худай, яшайиш хъсанардай мумкинвал гузва. Гьа са вахтунда чна уьлкведин азадвал, аслу туширвал ва чи хайи чил хуьн патал чанар къурбанд авур кьегьаларни рикIел хкизва”.

Ф.Агьмедова Афгъанистандин дяведин иштиракчи, Яру Гъед ордендин сагьиб, Россиядин МВД-дин Мегьарамдхуьруьн райондин отделдин ППСП-дин прапорщик Ф.Разаханован куьмекни галаз жаванрив паспортар вахкана. Жаванри чеб бубайрин крариз вафалу жеда лагьана кьин кьуна.

КIватI хьанвайбуруз Лезгийрин СтIал Сулейманан тIварунихъ галай госмуздрамтеатрдин коллективди концерт гана.

«Лезги газет»