Чи ватанэгьлияр — гьар сана
Харьковда яшамиш жезвай Амирбегов Геннадий Жамалдинович ана лезги диаспорадин вилик-кьилик квай векилрикай сад я. Ам 1955-йисан 6-августдиз Бакуда нафтIадин промышленностдин къуллугъчидин гзаф аялар авай хизанда дидедиз хьана. 10-классдал кьван шегьердин мектебда, гуьгъуьнлай са йисуз Ахцегьрин мектебда кIелна. Адан эсил-несил Докъузпара райондин Миграгърин хуьряй я.
Гьеле университетдик экечIдалди ада эцигунринни монтаждин управленида зегьмет чIугуна. Гуьгъуьнлай Украинадин МВД-дин махсус подразделенида кьве йисуз буржи тамамарна. Харьков шегьерда Горькийдин тIварунихъ галай ХГУ-дин тарихдин факультетдин нянин отделенида кIелна. Студентвилин девирда ада кIелунрихъ галаз сад хьиз В.Малышеван тIварунихъ галай заводда кIвалахни авуна.
1982-йисуз университет куьтягьайдалай кьулухъ Геннадий Амирбеговаз цIийи камар къачудай, пешедин рекьяй цIийи дережайрихъ фидай мумкинвал хьана. Жегьилзамаз зегьметдин, кIелунрин къадир, дад чир хьайи ватанэгьлиди профтехобразованидин хиле муаллимвиле кIвалахиз башламишна. Агалкьунралди преподавателвиле кIвалахдив эгечIай Г.Амирбеговакай са кьадар чIавалай “Харьковдин областдин эцигунрин технологийрин пешекарвилин образованидин региональный центр” гьукуматдин чирвилер гунин идарадин директор, Украинадин образованидин отличник хьана.
“Инсанрив — ачухдаказ, кардив — жавабдарвилелди, селигъалувилелди” — и келимаяр Геннадий Жамалдиновичан уьмуьрдинни пешекарвилин девиздиз элкъвенва. КIвалахдин рекьяй адахъ жезвай агалкьунар гьа ихьтин ерийрихъ галаз алакъалу я.
Алатай йисара ам Украинадин образованидинни илимдин министерстводин ва ватандашар кеспидал тайинардай гьукуматдин идарадин вилик-кьилик квай къуллугъчийрин дестедик кваз кIвалахдин рекьяй Канадада хьана.
ДатIана гьерекатдик квай ада азад вахтунда художественный ва пешекарвилин литература кIелзава, спортдизни майилвалзава. Хизанда са хва ва кьве хтул ава.
Украинада гзаф лезгияр яшамиш жезва. Шад жедай кар ам я хьи, эхиримжи йисара Украинадин гьукуматдин телеканалди гъвечIи халкьариз, гьа жергедай яз лезгийризни талукь милли передачаяр гузва. Геннадий Жамалдиновича Яран суварин йикъара ватанэгьлийриз лезги чIалал сувар тебрикна.
Адахъ гележегда вичи регьбервал гузвай чирвилерин идара мадни вилик тухудай, кIелзавайбурун чирвилерин ери хкаждай фикир ава. Ватанэгьлидихъ гьар са карда агалкьунар хьун чи мурадни я.
«Лезги газет»
