“Паркарин маршдин” кьилин месэлайрикай сад — аялар ва жегьилар тIебиат хуьнин месэлайрал чпин хушуналди машгъул жедайвал авун я. 2018-йис Россияда гуьгьуьллудан йис яз малумарнава, им лагьайтIа жегьилар чпин гележег туькIуьрунин месэладал желб авун патал хъсан мумкинвал я.
ТIебиат хуьн патал гьам тIебиатди вичи, гьам обществоди садрани тахьай жуьреда истемишзавай активлу гьерекатар кьабулдай вахт атанва. Ша чна и гьерекатар саналди кьиле тухун. Ша чна тIебиатдин къиметлу мулкар хуьз куьмек гун, жуван хуьре, районда ва, санлай къачурла, республикада кьиле тухузвай тIебиат хуьнихъ элкъуьрнавай важиблу мярекатра иштиракин, абур кьиле тухунин теклифар гун. Шаклу жедай вахт чахъ амач.
“Паркарин марш” — им Россиядин ва чи уьлкведихъ галаз сергьят авай маса государствойрин тIебиатдин кьетIендаказ хуьзвай мулкариз (ООПТ) куьмек гуниз талукьарнавай международный серенжем я.
“Паркарин маршдин” макьсад властдин, массовый информациядин такьатрин, бизнесдин ва вири обществодин ООПТ-рин месэлайрал желб авун, абуруз гьакъикъи куьмек гун, ватанэгьлийрин зигьинда чи тIебиатдин ва культурадин ирсинал дамах авунин гьиссер арадал гъун я.
Россиядин Президентдин “КьетIендаказ хуьзвай тIебиатдин мулкариз — виниз тир нетижалувал” грантдин сергьятра аваз, “Дагъустандин краеведческий центр” ДРОО-ди, Дагъустан Республикадин тIебиатдин ресурсрин ва экологиядин министерстводихъ, РД-дин образованидин ва илимдин министерстводихъ, “Дагъустандин тIебиатдин “Дагестанский” заповедник” ФГБУ-дихъ галаз санал республикадин умуми образованидин 50-далай артух мектебра экология хуьнихъ элкъуьрнавай “Паркарин марш” мярекат кьиле тухванва, абура мектебра кIелзавай 1300 аялди, 60 педагогди, “Дагъустандин тIебиатдин “Дагестанский” заповедник” ФГБУ-дин 8 пешекарди, 12 алимди, аспирантди, студентди, “Дагъустандин илимдинни край ахтармишдай центр” ДРОО-рин 5 векилди иштиракна.
“Паркарин маршдин” вахтунда заповедникри, милли паркари, гьакIни тIебиат хуьнин, образованидин маса идарайри элкъвей столар, ачух ракIаррин йикъар, жуьреба-жуьре темайрай выставкаяр тухванай.
“Паркарин марш” серенжемди жуван Ватандин тIебиатдин гележег авай гьалдай жавабдарвал гьиссунал, жуван чил, кIвал хуьз чир хьун лазим тирдал мектебра кIелзавай аялри экологиядин алай аямдин тIал алай зурба месэлаяр гьялунин карда важиблу роль къугъвазвайди гьисс авунал, тIебиатдин гуьзелвал ва михьивал хуьнай жавабдарвал гьисс ийиз тербияламиш хьунал гъун гуьзлемишзава.
Ислам Мегьамедов,
“Дагъустандин илимдинни край ахтармишдай центр” ДРОО-дин правленидин председатель
