Играми дустар! Чакай гзафбуру къени коронавирусдикай авай хата, зарар кьатIанвач. Гзафбуру духтурри, пешекарри гузвай меслятрал, михьивал хуьнин къайдайрал амалзавач.

ТIугъвал зарафат туш. Къенин юкъуз ам дуьньядин саки гьар са пипIе къекъвезва. Агъзурралди инсанар адан къурбандар хьанва.

23-октябрдиз Дагъустандин Кьилин везифаяр вахтуналди тамамарзавай Сергей Меликова республикада коронавирусдин вилик пад кьуниз талукь серенжемар къалурнавай цIийи къарар кьабулна. 28-октябрдилай Роспотребнадзордин къарардалди, вири Урусатда кIваляй куьчедиз экъечIзавай гьар са касди чинал маска алукIна кIанзава. Амма и къайдайрал парабуру амалзавач.

Тек са мисал. Гьар нянихъ Махачкъалада, Каспийскда авай ресторанра, кафейра кIватI жезвай кьван инсанриз килиг. ЧIехи пай – жегьилар. Абурукай лап тIимилбуру маскаяр алукIзава, къайдайрал амалзава. Са гафуналди, чIехи паюни жавабдарвал гьиссзавач. Нетижада начагъ жезвайбурун, рекьизвайбурун кьадар гзаф жезва.

За жуван дустариз, чирхчирриз, виридаз Роспотребнадзорди тайинарнавай къайдайрал амал авуниз эвер гузва. Вири Аллагьдин гъиле ава. Амма Аллагьди инсандиз лацудини чIулавди, хийирни зарар, писни хъсан кьатIун патал акьул ганва. Ша чна арадал атанвай гьалар фикир кьуна, мукъаятвал хуьн. И кардилай чи сагъламвал аслу я. Чун вири Аллагьди хуьрай. Амин!

Мегьамед Ибрагьимов