Республикада чIехибурукай сад тир, федеральный ва республикадин проектарни программаяр уьмуьрдиз кечирмишзавай Сулейман-Стальский район яшайишдин, экономикадин ва маса рекьерай йигин еришралди вилик физва. ИкI, алай вахтунда Вини СтIалрин хуьре Селимован ва Мира куьчейра къир цазва. Райондин кьил Нариман Абдулмуталибов и йикъара чкадал фена къир цунин кIвалахар кьиле физвай гьаларихъ галаз таниш хьана.
Къейд ийин хьи, санлай Селимован куьчедин майдан — 2150 кв метрдиз, Мира куьчедин майдан 1190 кв метрдиз барабар я. Кьве куьчедани къир цунин кIвалахар эхирдиз къвезва.
Ремонтринни эцигунрин кIвалахар “Центр-строй” подрядный организацияди кьилиз акъудзава. Заказчик Вини СтIалрин хуьруьн администрация, кIвалахрин къимет 2 млн. 400 агъзур манатдиз барабар я.
Куьчейра къир цадайла, эцигунринни ремонтрин маса кIвалахарни тамамарна.
Нариман Абдулмуталибов кIвалахар кьиле физвай гьалдилай рази яз амукьна.
Кьулан СтIалрин хуьре алай вахтунда 2019-йисуз райондин “Зи куьче виридалайни хъсандиз дуьзмишнавайди я” конкурсда-килигуна гъалиб хьайи Етим Эминан тIварунихъ галай куьчедани къир цунин кIвалахар эхирдиз къвезва. 887 метрдин яргъивал авай куьчедин майдан, санлай къачурла, 5319 квадратный метрдиз барабар я. Конкурсдин гъалибчи хьайи и куьче “Зи Дагъустан — зи рекьер” проектдик кутунвай.
И йикъара Нариман Абдулмуталибов талукь къуллугърин ва подрядный организациядин пешекарарни галаз къир цазвай чкадал фена, ийизвай кIвалахрихъ галаз таниш хьана.
Куьчеда къир цадайла, ремонтринни эцигунрин маса кIвалахарни кьилиз акъудна: куьчедихъ галаз маса куьчеяр алакъалу жезвай чкайрик яд авахьун патал 300 мм. диаметрдин асбестдин 32 метр турбаяр кутуна, 270 квадратный метрдин майданда и куьчедай маса куьчейриз физвай хивера къир цана, 12 чкадал рекьерин лишанар эцигна, Етим Эминан куьчеда къирдин кIаникай хъвадай яд фидай ракьун турбаяр (90 п/м) кутуна. И карни къведай йисуз Кьулан СтIалдал хъвадай цин цIийи линияр тухудайла куьчеда цанвай къирдин къат чIур тавун патал авунва.
Нариман Абдулмуталибова тамамарнавай кIвалахриз хъсан къимет гана.
Хуьрерин куьчейра къир цуникай рахадайла къейд ийиз кIанзава хьи, 2020-йисан 12-мартдиз Нариман Абдулмуталибова 23-нумрадик кваз акъудай тапшуругъдалди «Зи куьче виридалайни хъсандиз дуьзмишнавайди я» конкурс-килигун гуьгъуьнин йисарани давамарун малумарнай. Ада амай хуьреризни конкурсда иштиракуниз эвер гана. И жигьетдай гъавурда тунин кIвалах тухун тапшурмишнава.
Хазран Кьасумов
