За республикадин здравоохраненидин министерствода кьилин акушер-гинекологвиле кIвалахзавай. Чи министр Ильяс Агьмедович Мамаев тир.Гатун чими югъ алатна, ксудай вахт мукьва хьанвай. Йифен партални алукIна, зун, динжвал ийиз, ктабни хурал кьуна, кроватдал ярх хьанвай. Кайвани, кIвалин дердияр ахгудиз, кардик квай. Аяларни итим, пака экуьнахъ вуч тIуьна кIваляй фидатIа, гьазурвал аквазвай.
И арада, хабарни авачиз, агал тавунвай рак гатунни тавуна, дегьлиздиз кьве итим гьахьна. “Им духтур Эсетован кIвал тирди чаз чизва, гьавиляй, экв амаз акурла, хабарни кьун тавуна, атанва. Ихьтин геж вахтунда бес вучиз ракIар агалнавач? — суалзава мугьманри. — Азедин Мурадович кIвале авани?” — давамарна генани.
“Азедин, яда, ви патав мугьманар атанва!” кIеви сесиналди эвер гана заз кайваниди.
Зун, тадиз жув къайдадиз хкана, гуьзет тавунвай хванахваяр къаршиламишиз экъечIна. Дегьлиздин кьиле акъвазнавайбур чи министрни адан шофер яз хьана. Гьуьрметлу мугьманрихъ галаз за жуван кайванини танишарна.
Мафи Назировнани гуьгъуьна амукьнач. Вичин хура авай дасмалдалди гъилер михьна, эрчIи гъил министрдал яргъи авуна: “Зун куь кьилин акушер-гинекологдин Жануария я”, — танишвал гана ада вичин.
…А йикъара телевизордай Бразилиядин гзаф серияр авай кино къалурзавай. Ана Жануария тIвар алай са дишегьлиди кьилин роль тамамарзавай. Адан пеше хизандин столдал тIуьн-хъун дуьзмишун, къаб-къажах чуьхуьн, кухняда ва кIвалера михьивал авун, са гафуналди, чIехи кIвале майишат кьиле тухун тир. Вижевай тIварни алай — Жануария…
Чи кIвалени зи кайвани гьа кинодик квай Жануариядин юнда авай. Чахъ бакара къведай, куьмек гудай маса касни авачир. Гьаниз килигна, кайваниди, тарсуна жаваб гуз гьазур ученикди хьиз, кIвалин таржумагьал авайвал мугьманрин вилик дуьздал акъудна.
Мугьманар лагьайтIа, заз килигиз, са гафни рахан тийиз, акъвазнавай. Заз амукьайди жуван балайрин дидедин тIварни къуллугъ авайвал лугьун хьана: Мафи Назировна — Даггосуниверситетдин доцент, математик.
Итимри бул хъуьруьнарна, кайванидални цIийи тIвар атана…
Мугьманриз адан рафтарди таъсирнавайди ва адан зарафат рикIивай бегенмиш хьанвайди аквазвай.
Министр, зун вичин тапшуругъдин гъавурда туна, нянин вахтунда кIвалин рак агалунин меслятни гана, гежехийир лагьана, “Жануариядивай” багъишламишун тIалабна, хъфиз гьазур хьана.
Кайваниди атай мугьманар эглешарна:
“Экуьнахъ сейрдай хквезвай Урусатдин пачагь кьвед лагьай Николаял са сеферда рекьелай элячIзавай са жегьил кас дуьшуьш хьана. Гада акъвазарна, ада хабар кьуна: “Икьван фад куьн гьиниз физвайди я?”
— Из депа возвращаюсь домой, — жаваб ганай жегьилди. Императорди “депо” къецепатан уьлкведин гаф я, ам падежриз дегиш жезвайди туш, лагьана.
Жаваб яз, гададай акъатна:
— Куьн хьтин чIехи инсандин вилик дегиш тежедай гаф авайди туш…
И ван хьайила, Николая жегьилдиз хъфидай рухсат ганай лугьуда.
— Ихьтин геж вахтунда куьн хьтин милайим, рикIиз хуш инсанар къведайдакай рикIиз аян хьана, за рак кIев тавуна турди я. Жув гъалатI тахьунал зунни шад я. Куьн сагърай, гьуьрметлубур”, — лагьана, кайваниди атанвайбур рекье хтунай...
Мугьманриз кайванидин гафар гзаф хуш хьанвай.
Гьа и кьисадилай гуьгъуьниз, министрди, гьар зун дуьшуьш хьайила, Жануария гьикI ава лугьуз хабар кьадай ва вичин патай кIунчI цуькверни ракъурдай.
Са сеферда, дишегьлийрин суварин вилик, ада заз Жануарияни галаз санаторийдиз фин патал путевкани теклифнай…
Мафи Назировна чахъ галамачиз хейлин вахтар алатнава. Адаз рагьметрай. Вичин эбеди кIвале женнетдин ахварар атурай.
Ам гилани рикIелай алуд тийизвай Ильяс Агьмедовичазни Аллагьди сагълам, яргъал ва мублагь уьмуьрар гурай. Адахъ галаз — муькуь чи ярар дустаризни… Амин!..
Азедин Эсетов,
Дагъустандин халкьдин духтур
