Гаф кватай чкадал лугьун, эхиримжи вахтара Кьасумхуьрел, адан патарив гвай чкайра, хуьрерани аваданламишунин, рекьер ремонт авунин гьар жуьредин кIвалахар тухванва. Бязи чкайра абур галай-галайвал давамни жезва. И жигьетдай чун са кьакьан чкадилай Кьасумхуьруьн центрадиз, патаривай фенвай рекьериз, майданриз килигайтIа, ам шегьердиз ухшар яз аквазва.
Ина Ленинан тIварунихъ галай еке майдан, са шумуд куьче, Сулейманан парк, Мусаибан куьчени хъсандиз аваданламишнава. Чкадин ва къвез-хъфизвай мугьманрини и крарилай разивални ийизва, шадвални. Гьелбетда, халкь патал ийизвай и крар чеб чпелай арадиз къвезвач. Абур муниципальный райондин кьил Нариман Абдулмуталибован, адан командадин чалишмишвилерини спонсоррин куьмекри арадиз гъизва.
Мадни лагьайтIа, и хъсан шартIар арадиз атунихъ галаз санал, къенепата ишлемишзавай автотранспортдин кьадарни артух жезва. Рекьерин ДЭП-32 тешкилатдин къуллугъчийри ва техработникри, ГИБДД-дихъ галаз алакъада аваз, виликамаз чкаяр чирна, анрал талукь тир рекьерин лишанар эцигзава. И кардини машинар гьалзавайбуруз кIвалах хейлин къулай ва кьезил ийизва. Улакьар гьерекатдик квайла, ягъалмишвилер жезвач. И важиблу кIвалах тамамарзавай гъвечIи бригададин ихтиярда махсус автомашин, тадаракар ва алатар ава. Исятда и кIвалах райондин центрадал кьиле тухузватIани, икьван чIавалди КIахцугърин, ЦIийихуьруьн, Алидхуьруьн куьчейрани 20 чкадал рекьерин лишанар чарасуз герек чкайрал акIурнава.
И карда Айдемиров Кирима, Ярагьмедов Абдула, Абдулаев Сабира, Абдулаев Руслана тешкиллувал къалурзава. Рекьерин гьерекатра къулайвилер яратмишзавай и ксариз шоферри, яхдиз къекъвезвайбуруни чухсагъул лугьузва.
Райсудин Набиев, зегьметдин ветеран
