И йикъара Кьурагь райондин КIирийрин хуьруьн спортдин школа-интернатда райондин физический культурадинни спортдин ва жегьилрин крарин рекьяй отделди волейболдай ветеранрин арада кьиле тухвай 4-турнир Россиядин Игит Зейнудин Батманован экуь къаматдиз бахшнавай. Идакай чаз райадминистрациядин пресс-къуллугъди хабар гана.
Турнирда, Кьурагь райондилай гъейри, Мегьарамдхуьруьн райондин, гьакIни Дербентдин ва кьилди КIирийрин спортдин школа-интернатдин командайри иштиракна. Турнирдин тешкилатчийрин теклифдалди акъажунар кругдин къайдада кьиле тухвана. Къизгъин къугъунрин нетижада Кьурагьрин ветеранрин команда 1-чкадиз лайихлу хьана. Дербентдин командади — 2, КIирийрин школа-интернатдин командади 3-чкаяр кьуна.
Вири командайриз медалар, грамотаяр, пулдин ва спортдин пишкешар гана. Турнирда виридалайни хъсандиз къугъвайбур яз гьисабна: Загьидин Таибов (КIирийрин СОШИ), Исмет Мейланов (Дербент), Эдик Юлчиев (Мегьарамдхуьр), Камил Мусаев (Кьурагь). Жуьреба-жуьре пишкешриз къугъунрин тамашачияр ва судьяйрин коллегияни лайихлу хьана. Турнир вини дережада аваз кьиле фена.
Шабагьар вахкуниз талукьарнавай шад мярекат райондин физический культурадинни спортдин ва жегьилрин крарин рекьяй отделдин начальник Рамиз Рамазанова, Зейнудин Батманован стха Батман Батманова, Кьурагь райондин администрациядин кьилин заместитель Альберт Исаева кьиле тухвана. Абуру, турнирдин гъалибчияр тебрик авунихъ галаз сад хьиз, спортдин и серенжем тешкилай ва кьиле тухвай ксаризни сагърай лагьана.
Р. Рамалданова
