СтIал Сулейманан райондин администрацияда грэпплингдай ва Бразилиядин джиу-джитсудай дуьньядин 4 сеферда чемпион Далгат Османовахъ галаз гуьруьш шад гьалара кьиле фена, хабар гузва администрациядин пресс-къуллугъди.
РикIел хкин: Д.Османов 2018 ва 2019-йисара UWW версиядай, 2018-йисуз ACBJJ версиядай дуьньядин, гьакIни Россиядин чемпионвилин тIварариз лайихлу хьана. 2020-йисуз ада Европадин кубок къазанмишна. Мадни ам AJP версиядай вад сеферда (2015-2019-йй.), алатай йисузни UWW версиядин грэпплингдай (gi жуьредай) Дагъустандин чемпионвилин тIварарин сагьибни я.
Вичин 12 йис тамам хьайидалай инихъ спортдал рикIивай машгъул жезвай кьегьалдихъ спортдин рекье къазанмишнавай агалкьунар мадни ава. Абурук алатай йисан декабрдиз Санкт-Петербургда Бразилиядин джиу-джитсудай вили рангунин чIуларин сагьибрин арада нубатдин сеферда къазанмишнавай дуьньядин чемпионвални ава.
Райондин кьиле авай ксарихъ галаз кьиле фейи гуьруьшдал жегьилди вичин спортдин рекьин агалкьунрикай ва гележегдин планрикай суьгьбетна. Исятда чи ватанэгьлидин 23 йис я, ада Дагъустандин медицинадин госуниверситетда 5-курсуна кIелзава. Гележегда адаз хирург жез кIанзава.
Спортдин рекье еке агалкьунар къазанмишунай, акьалтзавай несил ватанпересвилин руьгьдаллаз тербияламишуник пай кутунай ва общественный крара активвал къалурунай райондин кьил Саид Темирханова Далгат Османоваз чухсагъул малумарна.
— Спортдин рекье куьне къазанмишнавай агалкьунри ва гъалибвилери чи руьгь хкажзава. Республикадин физический культура ва спорт вилик тухуник лайихлу пай кутунай квез виниз тир къимет гузва. Спортдин рекье къазанмишнавай агалкьунралди куьне хайи район машгьурзава. Вилик мадни еке гъалибвилер ква — квекай бажарагълу духтур ва пешекарвилин спортдани кьакьан кукIушар муьтIуьгъарун. За рикIин сидкьидай квехъ цIийи агалкьунар ва вилик эцигнавай планар кьилиз акъуддай къуватар хьун алхишзава. Квехъ чандин сагъвал ва бахтлу гележег хьурай! — алхишна Саид Темирханова.
Жегьил спортсмендин тIварцIихъ чими келимаяр и юкъуз райадминистрациядин кьилин заместителрини лагьана. Райондин спортдин, туризмдин ва жегьилрин крарин рекьяй комитетдин директор Чингиз Абдулмежидова, Д.Османован агалкьунар къейд авунихъ галаз сад хьиз, мукьвал вахтара жегьил спортсменди хайи районда грэпплингдай ва джиу-джитсудай мастер-классар кьиле тухунни планрик квайди малумарна.
«Лезги газет»
