Чи ватанэгьлияр — гьар сана

Чпел шак гъиз тежедай хьтин гафар яз лугьуз жеда хьи, чи миллетдиз чирвилер къачунихъ, пешедин рекьяй виликди финихъ, илимдин деринриз гьахьунихъ «къанихвал» хас я. Пешекарвал, чирвал авай касди девлетда вил твадач, ахьтинда фад-фад чIехи къуллугъ кьаз кIан хьунин алахъунарни ийидач. КьетIен ерийри, хесетри, алакьунри, керчеквили ахьтинбур алай чка, яргъайни аквадай эквер хьиз, малумарда.

Алай вахтунда Белоруссиядин Витебск шегьерда яшамиш жезвай, «Витебскдин племпредприятие» РУП-дин (рес­публикадин унитарный кархана) генераль­ный директор яз кIвалахзавай Физули Абдулбегович Гьасановакай адан стха, лезгийрин гьар са мярекатдик, месэладик вичин пай кутаз алахъзавай Садикь Гьасанова авур куьруь ихтилатдилай кьулухъ заз газет кIелзавайбурни чи лайихлу ватанэгьлидихъ галаз танишариз кIан хьана…

Физули Гьасанов 1959-йисан 23-ок­тябрдиз КцIар райондин ЧIакIарин па­ла­сада дидедиз хьана. 4 йисуз хайи хуьруьн ва гуьгъуьнлай КцIарин 1-нумрада мектебда чирвилер къачуна.

Сифте ам Бакудин политехнический институтдин улакьрин рекьерин факультетдик экечIна. Анаг акьалтIар тавунмаз, адаз армиядин жергейриз эверна. Кьве йи­сан муддатда Чита шегьерда аскервилин буржи тамамарна хтайдалай кьулухъ, бязи четинвилер себеб яз, Физули Гьасановаз вуз акьалтIардай мумкинвал хъхьанач.

Кьисметди Волгоград шегьердиз акъу­дай жегьил сифте анин  тракторрин завод­да кIвалахал акъвазна. Ам Волгог­раддин зооветеринарный колледждикни экечI­на ва яру диплом къачуналди анаг куьтягьна.

1986-йисуз ам Белоруссиядин Витебск шегьердиз куьч хьана. Вини дережадин чирвилер къачунин, илимдал машгъул хьунин къаст рикIе авай жегьил пешекарди колледждин диплом вич патал­ тIимил яз гьисабна: 1995-йисуз ада Ви­тебскдин ветеринариядин институтни­ акьал­­­тIарна. 2003-йисуз Ф.Гьасанова «ЯкIун жунгавар хуьдайла, абуруз гудай емдик кваз ферментный «Фекорд У4» цIийи дарман ишлемишунин нетижалувал» темадай диссертация хвена ва хуьруьн майишатдин илимрин кандидатвилин дережа къачуна.  2011-2015-йисара, гьа са вахтунда доцент яз, ветеринариядин кафедрадани кIвалахна. Ам кьилди ва маса авторрихъ галаз санал кхьенвай илимдин 15 макъаладин, чирвилер гуниз ва методикадиз талукь 5 ктабдин, 2 моног­рафиядин автор я, 1 патентни къачунва.

1988-йисалай Ф.Гьасанова вичин зегь­­метдин рехъ хуьруьн майишатдихъ галаз алакъалу авуна: гьайванрин духтур­виле, Витебскдин райондин Шапечино хуь­руьн «Звезда» колхозда-комбинатда (гуьгъуьнлай аникай «Липов­цы» ЗАО хъувуна) ири карч алай гьайванриз талукь хилен начальниквиле кIва­лахна.

2003-йисуз «Липовцы» ЗАО-дин кьиле акъвазна. 2009-йисуз и кархана ОАО-диз элкъуьр хъувуна. 2010-йисалай са кьадар вахтунда «Витебскдин племпредприятие»­ РУП-дин (республикадин унитарный кархана) генеральный директордин къуллугъ кьилиз акъудна. Гуьгъуьн­лай «Оршадин фан суьрсетрин комбинат» ОАО-дин гендиректорвиле тайинарна.

Ф.Гьасанова Витебскдин областдин губернатордиз хуьруьн майишатдин чIехи холдинг арадал гъунин теклиф гана. Тажуб жедай кар туш, жавабдар кIвалахдив эгечIай гьар са кархана хъсан дережадиз­ акъудунин алакьунар къалурзавай регьбер тирвиляй губернаторди цIийиз тешкилдай холдингдин кьиле акъвазун чи ватанэгьлидал ихтибарна. ИкI, Физули­ Абдулбеговичакай вичик гзаф кархана­яр акатзавай чIехи холдингдин генеральный директор хьана. Са шумуд йисуз кIва­лахайдалай кьулухъ адан тежриба вичи сифтедай регьбервал гайи ««Витебскдин племпредприятие» РУП-диз герек хтана.

2002-йисуз ада Белоруссияда авай дагъустанвияр санал кIватIна, диаспорадиз хейлин йисара ада регьбервални гана. Ватанэгьлидикай са шумуд йисуз Витебскдин райондин Советдин депутат хьана. Алай вахтунда ам Витебскдин ветеринариядин академиядин дипломрин комиссиядин председателни я.

Физули Гьасанован хизанда кьве хва, хъсан тербия гана, чIехи авунва. Ам пуд хтулдин чIехи бубани я. Яргъара аватIани, ам саки гьар йисуз хайи хуьруьз хквезва, мукьвабурухъ галаз алакъаяр са чIавузни атIузвач. Мадни кьакьан дережайрив агакь­­рай куьн, гьурметлу ватанэгьлияр!

Куругъли  Ферзалиев