Зул алукьнавай и йикъара СтIал Сулейманан райондин хуьруьн майишатдин карханаяр, лежбервилинни фермервилин майишатар, арендаторар ципицIар кIватI хъувунал машгъул я.

Райондин хуьруьн майишатдин ва суьрсетдин управленидин начальникдин заместитель Гьамидин Абдулкъафаровни галаз чун Эминхуьруьн мулкарал алай са шумуд майишатдиз ва арендаторрин участокриз фена, анра ципицIар кIватI хъувунин кIвалахар кьиле физвай гьаларихъ галаз таниш хьана.

Ингье чун хуьруьн кьилихъ галай ТIул участокда кардик квай лежбервилинни фермервилин «Аллахвердиев» майишатда ава. Тегьенгрик дигмиш хьанвай “Авгус­тин”, “Биянка”, “Рислинг”, “Ркацители” сор­тарин ципицIрин бегьер акурла, гуьгьуьлар шад жезва. Уьзуьмлухра хъсан къайда, михьивал ава. Майишатдиз тежрибалу уьзуьмчи, зегьметдин ветеран Алимет Ал­лагьвердиева регьбервал гузва. Ада виликдай 32 йисуз “Аламишинский” совхозда уьзуьмчивилин бригададин бригадирвиле, старший ва кьилин агрономвиле кIвалахна. Совхозар чкIайла Алимета 3,5 гектар ци­пицIлухар кирида къачуна, са шумуд йисуз анрай ципицIрин бул бегьерар вахчуна.

2008-йисуз А.Аллагьвердиеван хизанди 8 гектар чилин участок 49 йисан муддатда кирида къачуна, ана ципицIлухар ­ку­туна. Гуьгъуьнлай ада лежбервилинни фер­мервилин майишат тешкилна.

КФХ-дихъ “Белорусь” трактор, адахъ акалдай хуьруьн майишатдин алатар, пар чIугвадай, рабочияр кIвалахал тухуз-хкидай “Газел” улакьарни ава. Уьзуьмлухра тех­никадалди тамамарзавай кIвалахар Алимет Аллагьвердиеван гада, хъсан уьзуьм­чи ва механизатор тир Гьажимет Аллагьвердиева кьилиз акъудзава.

Виликан йисара хьиз, цIини КФХ-ди уьзуьмлухрин гьар са гектардай 120 центнердилай виниз бегьер кIватI хъийизва.

ЦипицIар кIватI ва дашмиш хъувунал гьар юкъуз 15 рабочий ва кьве механизатор машгъул я.

“Дагъустан Республикадин хуьруьн майишатдин лайихлу работник” тIварцIин сагьиб Алимирзе Агъамирзоевни тежрибалу уьзуьмчи я. Адани гзаф йисара “Аламишинский” совхозда уьзуьмчивилин бригададин бригадирвиле, Эминхуьруьн ГУП-да ва “Зардиян” ООО-да кьилин агрономвиле кIвалахна. Эхиримжи йисара, аренда­тор яз, ам 8 гектар уьзуьмлухрихъ гелкъвезва. Чун адан ципицIлухриз фейила, Алимирзе Агъа­мирзоев вичин уьмуьрдин юлдаш Эльмирадихъ ва куьмекдиз гъанвай 5-6 рабочийдихъ галаз эхиримжи гектаррай ципицIар кIватI хъувунал машгъул тир. Гектардин бе­гьерлувили 80-85 центнер тешкилзава.

Эминхуьруьн мулкарал Надир Ягьяеван, Миламудин Мегьамедован, Расим Гьамзатован, Жамал Тагьирован ва масабурун кирида кьунвай участокрани ципи-цIар кIватI хъувунин кIвалахар давам жезва. Бегьер Дербент шегьердин комбинатриз ва заводриз вахкузва.

Хазран  Кьасумов