Сентябрдин вацран делилралди, алай йисуз Дагъустандиз мугьман хьайи туристрин кьадар 820 агъзурдав агакьна. Алатай йисарив гекъигайла, цIи и рекъем артух хьанва.
Республикадин туризмдин крарин рекьяй ва халкьдин яратмишунрин сеняткарвилерин министерстводин (Минтуризм) пресс-къуллугъди хабар гузвайвал, Дагъустандиз къвезвай туристрин кьадар йисалай-суз гзаф жезва: 2017-йисуз Дагъларин уьлкведиз 608 агъзур турист атана, 2018-йисуз — 700 , 2019-йисуз — 750 агъзур.
Къейд ийин хьи, 2020-йисуз и рекъем 840 агъзурдав агакьнавай. И жигьетдай 2021-йисан нетижаяр кьаз гьеле фад я, гьикI лагьайтIа, йис куьтягь жедалди 4 варз ама. И девирда Дагъустандиз хейлин туристар атун вилив хуьзва.
РД-дин Минтуризмдин делилралди, республикадиз виридалайни гзаф туристар майдин вацра атана.
Дагъларин уьлкведи къецепатан регионра, уьлквейра яшамиш жезвайбурун фикир дуьшуьшдай желбзавач. Ина тIебиатдин ва археологиядин надир имаратар ава. Урусатда мад санани гьалтзавачир субтропикрин там (Самурдин там) Дагъустанда ава. Туристрин рикI алай чкайрик гьакIни яргъивилел 12 км алай “Сарыкум” къумлух, Сулакдин дагьар акатзава.
Мадни туристри гзаф итиж ийизвай чкайрин арада Докъузпара райондин Къурушрин хуьр, Шалбуз дагъ, ЦIахур, Къала-Къорейш (VI асирдин имарат), Дербент шегьер, Нарын-къеле ва масабур ава.
Агьмед Магьмудов
