Алатай гьафтеда Махачкъалада РД-дин Гьукуматдин Председателдин Сад лагьай заместитель Батыр Эмееван регьбервилик кваз къиметрал гуьзчивал тухунин жигьетдай кардик квай штабдин заседание кьиле фена. Сад лагьай вице-премьерди къейд авурвал, уьлкведин маса регионра хьиз, Дагъустандани са жерге метягьрин къиметар хкаж хьанва. Штабдин членри, заседанидин сергьятра аваз, кьилди къачуртIа, эцигунра герек къвезвай затIарин, недай-хъвадай суьрсетдин ва улакьра кузвай газдин къиметар хкаж хьунихъ галаз алакъалу месэлаяр веревирдна.
РД-дин эцигунрин министр Артур Сулейманован докладдай малум хьайивал, 2020-йисан эхиррилай гатIунна, 2021-йисан июндал кьван ракьун къимет хкаж хьана. Сентябрдин вацралай ракьун къимет агъуз аватиз гатIунна.
РД-дин хуьруьн майишатдин ва суьрсетдин министр Баттал Батталован гафаралди, апрелдин, майдин варцара базарра са жерге майвайрин къиметар хкаж хьанвай. Амма бегьер кIватI хъийидай вахт алукьнамазди абурун къиметар агъуз ават хъувуна. Ада къейд авурвал, алай вахтунда 1 кг картуфрин тупуналди маса гудай къимет (оптовый) — 25, кура-кура маса гудай къимет (розничный) 28-30 манат я; 1 кг чугъундурар — 17-22 манат, кура-кура — 30 манат; 1 кг газарар — 22-25 манат, кура-кура — 30-35 манат. Къиметар хкаж хьунин себебрикай сад 2020-йисуз уьлкведа гьасилай суьрсетдин кьадар тIимил хьун, тIугъвал ва Урусатдиз къецепатан уьлквейрай тIимил метягь гъун я.
Агьалияр мекерайрин куьмекдалди ужуз къиметрай суьрсетдал таъминариз жеда. Республикадин шегьеррани районра мукьвал-мукьвал хуьруьн майишатдин мекераяр тешкилдайвал я.
«Лезги газет»
