СтIал Сулейманан райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ, адан замес­титель Къазиагьмед Абумуслимовахъ ва Эминхуьруьн администрациядин кьил Сабир Юзбеговахъ галаз чун и йикъара и хуьруьн мулкунал кардик квай фермервилинни лежбервилин майишатриз, арендаторрин участокриз фена, анра гатфарин чуьлдин кIвалахар кьиле физвай гьалдихъ галаз таниш хьана.

— Чи хуьруьнвияр чилин къадир авай, зегьметдал рикI алай инсанар я, — хуьруьн кьилихъ галай уьзуьмлухрин чIехи майданриз вил яна хьиз, лугьузва Сабир Юзбегова­. — Агьалийри хуьруьн майишатдин метлеб авай чиликай тамамвилелди менфят къачузва. Кьуд пад багълар, уьзуьмлухар, векьин уьруьшар­, теплицайрин майишатар, салар я.

Ихтилатрик кваз чун Надир Ягьи­яеван лежбервилинни фермервилин майишатдиз (КФХ-диз) агакьна. Гьасятда кьатIуз жезва: гзаф хилерин майишат я.

Адахъ 36 гектар чил ава. Идакай 15 гектар уьзуьмлухар, амайбур багълар я.

— Надир стха районда хуьруьн майишатдин лап хъсан пе­ше­­каррикай сад я, — лугьузва. Къ.Къа­зиагьмедова. — Ада вичин майишатда производстводин кIвенкIвечи къайдаяр ишлемишзава. Кьилди­ къа­чуртIа, тежрибалу агрономди­ уьзуьмлухрин чIехи паюна яд стIал-стIал гудай къурулуш кардик кутунва. Гележегда и къайда амай участокдани ишлемишда.

Алатай йисуз КФХ-да саки­ 10 гектарда картуфарни цана. Н.Ягьи­я­еваз и кар менфятлу яз акунач, акъа­тай харжарни арадал хтанач. Нетижада ада 7,5 гектардин майданра цIийи уьзуьмлухар кутуна. Ана цайи чубукарни чкадал гьасилна.

— Чи шартIара уьзуьмчивал менфятлу, къазанжияр арадал гъидай хел я, — лугьузва Н.Ягьияева. — Гектардин бегьерлувили 90-100, бязи участокра 110-130 центнер тешкилзава.

Чаз акурвал, майишатдин гьам бегьердал атанвай, гьамни жегьил уьзуьмлухра хъсан къайда, михьивал ава. Жергейрин араяр цанва, тегьенгрин пунариз пер янава, кьурай ва герек авачир хилер атIанва. Мукьвара уьзуьмлухриз гатфарин ятар гунив эгечIда.

Уьзуьмчивилелай гъейри, КФХ ичер, шефтелар, хутар, салан майваяр гьасилунални машгъул жезва. Багъларни хъсан гьалда ава.

— Къе-пака багъ­ла­риз, уьзуьм­лухриз­ ятар гудай вахт жеда, — суьгьбетдик экечI­за­ва Къазиагьмед Абу­муслимов. — И кар па­тал «Аламишинский» къанал (13 км) ремонтна, къайдадиз­ гъанва.­ Хуьруьн мул­ку­на авай къенепа­тан къаналар­ни хъсан гьал­да ава. Инан­­миш­­вал ийиз кIан­зава хьи, хуьруьн майишатдин суьрсет гьасилзавай карханайриз, лежбервилин майишатриз ва арендаторриз дигидай цикай дарвал жедач.

Хуьруьн мулкуна авай майи­шат­­рани арендадин участокра кьи­ле­ тухузвай чуьлдин кIвалахар акур­ чун анай гуьгьуьлар шад яз экъечIна.

— КIвалах дуьз тешкилнавай Надир Ягьияеван КФХ-дихъ, ина кардик квай амай майишатрихъ ва арендаторрихъни цIинин йисузни агалкьунар жедайдал шак алач, — алава хъувуна Къ.Къазиагьмедова.

Эхь, зегьмет бул бегьердин, агалкьунрин бине я.

Хазран Кьасумов