Яргъал йисара производствода гьакъисагъвилелди зегьмет чIугунай, гьар йисуз емишрин девлетлу бегьерар кIватI хъувунай ва СтIал Сулейманан райондин экономика вилик тухуник еке пай кутунай мукьвара Агъа СтIалрин хуьряй тир «Садовод» ООО-дин директор Сеферали Сефикъулиеваз Дагъустан Республикадин хуьруьн майишатдин ва суьрсетдин министерстводин патай Гьуьрметдин грамота гана. Ам кIвенкIвечи багъманчидив муниципалитетдин кьил Саид Темирханова шад гьалара вахкана.
Зегьметди инсандал баркалла гъида лугьуда. Гьакъикъатдани, чилел зегьмет чIугвазвай, суьрсет гьасилзавай инсанриз вири девирра халкьдин патай гьуьрмет хьайиди я. ТIебиатдин шартIарал ва кьунвай майданрал гьалтайла, хуьруьн майишатдинбурук акатзавай районда АПК-дин хиле 20 агъзурдалай виниз кьилдин ксарин куьмекчи майишатри ва 960 кас арендаторри зегьмет чIугвазва. Зегьмет вичин уьмуьрдин игьтияждай кьунвай С.Сефикъулиевахъ галаз зун алатай йисуз райондин хуьруьн майишатдин ва суьрсетдин управленидин начальник Къазиагьмед Къазиагьмедова танишарнай. Чун мугьман хьайила, арендатор тир ам хуьруьн кIанихъ галай багъда мичIи-вили рангунин «кабардинка» сортунин ири хутар атIунал машгъул тир.
— Сеферали Февралович хьтин инсанрикай рахадайла, зи рикIел Максим Горькийди лагьай «заз зи вири уьмуьрда кIвалахиз кIандай ва чпелай кIвалах алакьдай инсанар халис игитар яз аквада» гафар къведа, — лугьузва Къ.Къазиагьмедова. — Халкьдин суфра берекатлу авун патал зегьмет чIугвазвай гьар са кас чIехи гьуьрметдиз лайихлу я.
Гьакъикъатдани, С.Сефикъулиев гзаф йисарин тежриба авай багъманчи, тарарин кьурай ва герек авачир хилер атIудай, къелемриз тIурар гудай, тарарин пунариз пер ядай, емишар зиянлу гьашаратрикай ва азаррикай хуьдай халис устад я. Багълара агротехникадин гьар са серенжем вахтунда ва галай-галайвал кьиле тухузва.
С.Сефикъулиев кьиле авай майишатдихъ 20 гектар багълар ава. Анра хутар, шефтелар, пIинияр, ичер, чуьхверар, шуьмягъар гьасилзава. Иесивилелди гелкъуьн тешкилнавай багъларай гьар йисуз емишрин бул бегьер кIватI хъийизва.
С.Сефикъулиева чаз лагьайвал, гьасилзавай емишар виликамаз кутIунзавай икьраррин бинедаллаз республикадин ва Россиядин шегьерриз рекье твазва.
— Хъсан еридин, экологиядин жигьетдай михьи продукциядиз райондин къенепатани муьштерийрин патай игьтияж ава, гьавиляй емишар чкадални маса гузва, — лугьузва С. Сефикъулиева.
Къейд ийин хьи, багълара цанвай къелемар чкадал гьасилнавайбур я. Адахъ, емишрин цилер цана, къелемар гьасилунин, къелемриз тIур гунин рекьерайни тежриба ава.
— Чи райондин мулкар, иллаки Кьасумхуьруьн, Агъа, Кьулан ва Вини СтIалрин чилер багълар кутуниз, емишрин бул бегьерар гьасилуниз кутугай чкаяр я, — лугьузва С.Сефикъулиева. — И кар себеб яз, чи ерийра инвестицийрин проектарни уьмуьрдиз кечирмишзава, виниз тир бегьер гудай цIийи къайдадин багъларни кутазва.
Сеферали Февраловича гьисабзавайвал, къецепатан гзаф уьлквейри Россия патал къадагъаяр эцигнавай алай вахтунда агропромышленный комплекс вилик тухунихъ, хуьруьн майишатдин продукциядин кьадар артухарунихъ еке метлеб ава.
Алай вахтунда ООО-дин зегьметчияр гъиле авай йисан бегьердин бине кутунин къайгъуйра ава. И йикъара багълариз ятар гузва.
РД-дин хуьруьн майишатдин ва суьрсетдин министерстводин Гьуьрметдин грамота мубарак авуналди, чаз лугьуз кIанзава: ви зегьметдин бегьерар мадни артух хьурай, Сеферали Февралович!
Хазран Кьасумов
